Ohangaron poligonidagi yong‘in uchun “Maxsustrans”ga qariyb 684 mln so‘mlik kompensatsiya hisoblandi

11-12 iyul kunlari ekologiya nazorati inspeksiyasi va ekopolitsiya xodimlari Toshkent shahri havosining ifloslanishi yuzasidan o‘rganish o‘tdi.

Ekologiya qo‘mitasi xabariga ko‘ra, tekshiruv davomida Toshkent viloyati Ohangaron tumanidagi Yangihayot qo‘rg‘oni hududida joylashgan maishiy chiqindilar poligonida chiqindilarni joylashtirish va ko‘mish ishlari talab darajasida tashkil etilmagani sabab 10 iyul kuni yong‘in sodir bo‘lgani aniqlangan.

Holat yuzasidan poligon rahbari ma’muriy javobgarlikka tortilgan va yong‘inni zudlik bilan bartaraf etish bo‘yicha majburiy ko‘rsatma berilgan. Biroq ekopolitsiya tomonidan o‘tkazilgan qayta tekshiruvda ushbu ko‘rsatma bajarilmagani, yong‘in 11 iyul kuni ham davom etgani ma’lum bo‘lgan. Shu munosabat bilan poligon rahbari Ma’muriy javobgarlik to‘g‘risidagi kodeksning 91-moddasi 2-qismi asosida takroran jarimaga tortilgan.

Laboratoriya tahlillari yong‘in oqibatida atmosfera havosidagi ifloslantiruvchi moddalar miqdori sezilarli darajada oshganini ko‘rsatgan. Xususan:

• uglerod oksidi — 10,7 baravar;

• formaldegid — 12,2 baravar;

• azot dioksidi — 12,8 baravar;

• oltingugurt dioksidi — 9 baravar;

• vodorod sulfidi — 1,5 baravar ruxsat etilgan me’yordan yuqori ekani qayd etilgan.

Tahlillar asosida atmosfera havosiga yetkazilgan zarar uchun “MAXSUSTRANS-ISHB” DUKka 683 mln 870 ming so‘m miqdorida qo‘shimcha kompensatsiya to‘lovi hisoblangan. Tegishli hujjatlar sud organlariga yuborish uchun tayyorlanmoqda.

Ekologiya qo‘mitasining qayd etishicha, mazkur poligon qurilishi 2021 yilda boshlangan bo‘lsa-da, hozirgacha foydalanishga rasman topshirilmagan. Shunga qaramay, 2025 yil may oyidan buyon Toshkent shahridan chiqarilayotgan maishiy chiqindilar aynan shu poligonga olib kelinib joylashtirilmoqda.