Suv xo‘jaligi vazirligi suv tejovchi texnologiyalarni joriy qilish boshqarmasi boshlig‘i Abdurashid Qulmatovning Kun.uz’ga ma’lum qilishicha, suv yetkazib berish muammosi bilan bog‘liq material e’lon qilingandan keyin vazirlik ishchi guruhi tomonidan holat joyiga borib o‘rganilgan. Sirdaryo-So‘x irrigatsiya tizimlari havza boshqarmasi, “Suvxo‘jaliknazorat” inspeksiyasi Farg‘ona viloyat boshqarmasi, Nasos stansiyalari va energetika boshqarmasi, “Isfayram-Shohimardon” irrigatsiya tizimi boshqarmasi, Farg‘ona tumani “Suv yetkazib berish xizmati” davlat muassasasi vakillari bog‘bonlar bilan uchrashuv o‘tkazishgan.
Chimyon qishlog‘i Quyi archa mahallasidagi adirlikka suv yetkazib berishda kamchiliklarga yo‘l qo‘ygan mas’ullarga chora ko‘rilgan.
Murojaatchilar va fermerlarning talabiga binoan hududga yangi mirob tayinlangan. “Archa 1, 2” nasos stansiyasi soz holatga keltirilib, ishga tushirilgan. Mirob Sh.I.ga nisbatan xizmat tekshiruvi o‘tkazilishi belgilangan.
