«Dunyo» axborot agentligi ma’lum qilishicha, fuqaro M.X. 2025 yilda Chexiyaga kelgan va keyinchalik mehnat faoliyati munosabati bilan Polshaning Vrotslav shahrida vaqtincha yashagan. 2026 yil fevral oyida Pragada bo‘lgan vaqtida uning xorijga chiqish pasporti o‘g‘irlab ketilgan.
Shundan so‘ng u shaxsini tasdiqlovchi hujjatlarsiz qolib, huquqiy maqomini tiklash hamda O‘zbekistonga qaytishda qiyinchiliklarga duch kelgan.
Fuqaroning murojaatidan keyin O‘zbekistonning Chexiyadagi elchixonasi tomonidan zudlik bilan konsullik-huquqiy yordam ko‘rsatildi. Ko‘rilgan choralar natijasida uning deportatsiya qilinish xavfi bartaraf etildi hamda O‘zbekistonga qaytish guvohnomasi rasmiylashtirib berildi.
Shuningdek, Chexiya Ichki ishlar vazirligi bilan hamkorlikda vatandoshning aviachipta xarajatlarining bir qismi Chexiya tomonidan qoplab berildi. Natijada u sog‘-salomat O‘zbekistonga qaytib keldi.
Qayd etilishicha, O‘zbekistonning xorijdagi diplomatik vakolatxonalari chet ellarda murakkab vaziyatga tushib qolgan fuqarolarga huquqiy va konsullik yordamini ko‘rsatish, shuningdek, ularning qonuniy huquq va manfaatlarini himoya qilish bo‘yicha ishlarni izchil davom ettirmoqda.
