Коррупцияга қарши курашиш агентлиги директори Акмал Бурҳонов муҳокамаларга сабаб бўлаётган Тошкент шаҳридаги автобус бекатларининг янгиланиши масаласини ўрганди.
Аниқланишича, Ўзбекистон президентининг ПҚ–111 ва ПҚ–368-сон қарорларига мувофиқ, пойтахтдаги 1 785 та автобус бекатини белгиланган талаблар асосида модернизация қилиш мақсадида тегишли мулкий мажмуаларни, шу жумладан автобус бекатлари, улар жойлашган ер участкалари ва иншоотларни ижара ҳуқуқи асосида “E-Auksion” электрон савдо платформасига чиқариш вазифаси юклатилган.
Қарорга кўра, автобус бекатларини реконструкция қилиш ва янги намунавий бекатларни ўрнатиш билан боғлиқ барча ишлар электрон аукцион ғолибининг ўз маблағлари ҳисобидан амалга оширилиши белгиланган.
2025–2026 йилларда ўтказилган электрон аукционларда 266 та бекат жойлашган ер майдонлари ҳамда қўшимча 230 та ижтимоий бекат қуриш бўйича “Ewi snacks” МЧЖ ғолиб деб топилиб, тегишли ижара шартномалари имзоланган.
Тасдиқланган жадвалга кўра, 60 та ижарага олинган ва 60 та ижтимоий, жами 120 та бекат 2026 йил май–июн ойларида фойдаланишга топширилиши лозим эди.
Бироқ ўрганишлар давомида кўплаб бекатларда қурилиш-монтаж ишлари якунланмагани, зарур жиҳозлар тўлиқ ўрнатилмагани ҳамда фойдаланишга топширилиши режалаштирилган 120 та бекатнинг бирортаси бўйича ҳам қабул қилиш далолатномаси расмийлаштирилмагани аниқланди.
Шу муносабат билан, Коррупцияга қарши курашиш агентлиги Тошкент шаҳар ҳокимлигига шартнома ва битимда белгиланган мажбуриятларнинг ўз вақтида ва тўлиқ бажарилишини, бекатларни тасдиқланган техник талабларга мувофиқ жиҳозлаш ҳамда фойдаланишга топшириш жараёнини қатъий назоратга олиш зарурлигини кўрсатиб ўтди.
Шунингдек, келгусида ўтказиладиган аукцион савдоларида рақобат муҳитини кенгайтириш, кўпроқ тадбиркорлик субъектларининг иштирок этишига имконият яратиш мақсадида автобус бекатларини туманлар ёки ҳудудий бирликлар кесимида алоҳида лотларга ажратган ҳолда савдога чиқариш ҳамда лойиҳалар тўғрисида жамоатчиликни мунтазам равишда хабардор қилиб бориш юзасидан масъулларга тегишли кўрсатмалар берилди.
Агентлик мазкур жараён юзасидан ўрганишларни давом эттиради. Якунлари бўйича аниқланган камчиликларни бартараф этиш юзасидан белгиланган тартибда чоралар кўрилади, дейилади идора ахборотида.
Таъминотчи ҳақида
Ewi Snacks 2025 йил 12 февралда давлат рўйхатидан ўтган. Устав фонди – 100 минг сўм. Асосий фаолият йўналиши – реклама агентлиги.
Корхона таъсисчиси – “East West Invest” МЧЖ ҚК. 2013 йилда очилган мазкур корхона эгалиги Redlex Trans Ltd (98,21 фоиз) ва Ҳалимов Шаҳзод Шавкатовичга (1,79 фоиз) тегишли.
Ҳоким изоҳи
2026 йил март ойи бошида Тошкент шаҳар ҳокими Шавкат Умрзоқов барча бекатларни ягона стандарт асосида босқичма-босқич модернизация қилиш тўғрисидаги қарорни имзолаган эди. Ҳужжатга кўра, пойтахтдаги жами 2717 та бекатдан 1185 таси янгиланиши, шунингдек, улардаги ноқонуний савдо шохобчалари олиб ташланиши белгиланган.
Умрзоқов июн ойида Kun.uz'га берган интервюсида янги бекатларнинг нархи 10-20 минг доллар туриши, харажатлар хусусий шерикнинг зиммасида эканини айтганди.
“Амалиёт шуни кўрсатадики, бекатлар дўконга айлантирилганда автобуслар учун муаммо пайдо бўлади: автомобиллар бекат олдида тўхтайди, автобус йўлаги банд бўлади, чиқиндилар кўпаяди, ноқулайликлар юзага келади. Айрим ҳолатларда ҳатто бекатлар қулфлаб қўйилгани учун йўловчилар кўчада қолиб кетган ҳолатлар ҳам бўлган.
Янги бекатларни халқаро стандартлар асосида қуряпмиз. Улар хавфсизлик тугмаси, интернет, автобуслар ҳаракат жадвали ва бошқа замонавий қулайликлар билан жиҳозланади. Ҳатто сув ёки енгил маҳсулот харид қилиш учун вендинг аппаратлари ҳам ўрнатилади.
Бироқ бундай бекатларнинг ҳар бири 10 мингдан 20 минг долларгача маблағ талаб қилади. Шунинг учун лойиҳани давлат-хусусий шериклик асосида ташкил этдик. Давлат харажат қилмайди, хусусий шерик эса бекатни сақлаш ва бошқаришни ўз зиммасига олади. У даромадни реклама ёки вендинг хизматлари орқали олади”, – деганди пойтахт раҳбари.
Жуда иссиқ об-ҳаво кузатилган июл ойи ўрталарида Kun.uz янги бекатлардан одамлар қанчалик рози эканини ўрганиш учун сўровнома ўтказди. Унда респондентларнинг аксарияти янги бекатлар қуёш, ёмғир ва бошқа ноқулай об-ҳаво шароитларидан етарлича ҳимоя қила олмаслигини таъкидлади.
