Бош прокуратура ҳузуридаги департаментнинг Мирзо Улуғбек тумани бўлими ҳамда Солиқ қўмитаси ходимлари ҳамкорлигида ўтказилган терговга қадар текширувда йирик миқдордаги бюджет маблағларини талон-торож қилиш ҳолати фош этилди.
Аниқланишича, E.P., M.M. ва E.S. МЧЖ масъул шахслари ўзаро тил бириктириб, гўёки 322,4 млрд сўмлик маҳсулотлар етказиб берилгани ҳақида сохта маълумотларни расмийлаштирган.
Шунингдек, улар назорат-касса машиналари орқали савдо амалга оширилгандек кўрсатиб, фуқаролар номига 3 363 та сохта харид чеки расмийлаштирган. Мазкур чеклар асосида ижтимоий ҳимоя реестрига киритилган фуқароларга Soliq Mobile иловаси орқали “кешбэк” тўлангани кўрсатилиб, 1,4 млрд сўм бюджет маблағи талон-торож қилинган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатларни қалбакилаштириш ва улардан фойдаланиш) билан жиноят иши қўзғатилган. Ҳозирда иш бўйича тергов ҳаракатлари олиб борилмоқда.
