Jizzaxda ikki kishi o‘lgan YTH sababchisi ochiqda qoldirildi. Kun.uz holatga oid ish materiallari bilan tanishdi.
Osmonsoydagi YTH
Ayanchli YTH 2026 yil 13 mart kuni kechga yaqin Forish tumanining Osmonsoy mahallasi hududida sodir bo‘lgan.
Alisher Yaxshibekov Cobalt mashinasini yo‘lning qarama-qarshi yo‘nalishida boshqarib, o‘z yo‘nalishida kelayotgan ikkinchi Cobalt bilan to‘qnashgan. Oqibatda ikkinchi mashinada yo‘lovchi sifatida ketayotgan 61 yoshli erkak hamda 39 yoshli ayol halok bo‘lgan. Shuningdek, ushbu mashina haydovchisi va yana bir yo‘lovchi (ayol kishi) og‘ir tan jarohati olib, shifoxonaga yotqizilgan.
“Tezligi kamida 140 km/soat edi”
Kun.uz tanishgan tergov materiallarida Alisher Yaxshibekovning ko‘rsatmasi keltirilgan. U ushbu YTH qanday sodir bo‘lganini eslolmasligini aytgan.
“Mashinam nimagadir urilganini, taqillagan ovoz eshitilganini bilaman, undan so‘ng nima bo‘lganini bilmayman. O‘zimga kelganimda Forish tuman shifoxonasida ekanman. Ushbu YTH qanday sodir bo‘lganini eslolmayman”, degan u.
Jabrlangan mashina haydovchisi esa Alisher Yaxshibekov boshqaruvidagi Cobalt quvib o‘tish qoidasini buzgan holda uning yo‘liga chiqqanini bildirgan.
“YTH mening yo‘nalishimda sodir bo‘ldi. Cobalt kamida 140 km/soat tezlikda harakatlanib kelib, taxminan 40-50 metr qolganda yo‘nalishimga chiqib ketdi. Mashinamni keskin tormozladim. Cobalt kelib urildi va mashinam qarama-qarshi tomondagi chuqurlikka tushib, ag‘darildi”, degan jabrlanuvchi haydovchi.
“Nohaqlik bo‘lyapti”
Ushbu YTHda og‘ir tan jarohati olib, to‘shakka mixlanib qolgan Madina Inamovaning ukasi Kun.uz bilan bog‘lanib, holat bo‘yicha nohaqlik bo‘layotganini ma’lum qildi.
“Hokimning jiyanini qamoqqa olmadi, nohaqlik bo‘lyapti. 4 oydan beri kelib xabar olmaydi yoki nima bo‘ldi demaydi. Opam qariyb nogiron bo‘lib qoldi. O‘qituvchi edi. 3 nafar bolasi bor”, deydi u.
Tergov hujjatlariga ko‘ra, guvoh tariqasida so‘roq qilingan Madina Inamova davolanish uchun 170 mln so‘m sarflaganini aytgan.
“Oq rangli Cobalt yo‘limizga chiqib keldi. Keyin nima bo‘lganini bilmayman. O‘zimga kelganimda shifoxonada ekanman. Yotib davolandim, 170 mln so‘m xarajat qildim. Qarama-qarshi yo‘nalishga chiqqan haydovchi xabar olmadi”, degan u.
Sudga oid tibbiyot ekspertizasining 22 maydagi xulosasida Madina Inamovaning jarohati hayot uchun xavfli bo‘lgan og‘ir tan jarohati sifatida baholangan.
Haydovchi ochiqda qolgan
Holat yuzasidan Jinoyat kodeksining 266-moddasi 3-qismi “a” bandi bilan (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) jinoyat ishi qo‘zg‘atilgan. 2026 yil 29 may kuni Alisher Yaxshibekovga nisbatan garov ehtiyot chorasi qo‘llangan.
Kun.uz 1993 yilda tug‘ilgan Yaxshibekov Alisher Dilshod o‘g‘li Forish tumani hokimi Islomov Sohib Yaxshibekovichning akasi Islomov Dilshod Yaxshibekovichning o‘g‘li ekanini aniqladi.
Eslatib o‘tamiz, odamlar o‘limiga va boshqa og‘ir oqibatlarga sabab bo‘lgan yo‘l transport hodisasini sodir etish muayyan huquqdan mahrum qilib, 10 yilgacha ozodlikdan mahrum qilish bilan jazolanadi.
