Qirg‘izistonlik tadbirkorlar Moskva va Tambov oblastlaridagi Wildberries logistika majmualariga dronlar hujumi oqibatida zarar ko‘rdi. Bu haqda Qirg‘iziston iqtisodiyot va tijorat vaziri Bakit Sidiqovning Qirg‘izistondagi Wildberries vakili bilan uchrashuvi yakunlari bo‘yicha ma’lum qilindi.
Vazirlikning bildirishicha, tikuvchilik sohasida faoliyat yurituvchi tadbirkorlarning mahsulotlari kompaniyaning Elektrostal va Kotovsk shaharlaridagi omborlarida saqlanayotgan bo‘lgan. Wildberries vazirlikka zarar hajmini baholash ishlari olib borilayotgani, ombor infratuzilmasiga yetgan zarar aniqlanayotgani va omborlardagi mahsulotlar inventarizatsiya qilinayotganini ma’lum qilgan.
Baholash ishlari va olingan ma’lumotlarni tahlil qilish yakunlanganidan so‘ng vazirlik oqibatlarni bartaraf etish bo‘yicha qo‘shma yechimlarni ishlab chiqish maqsadida kompaniya vakillari bilan yana bir bor uchrashishni rejalashtirmoqda.
«Mahalliy tadbirkorlarga yetkazilgan dastlabki zarar hajmini aniqlash maqsadida Qirg‘iz Respublikasi Iqtisodiyot va tijorat vazirligi tomonidan tikuvchilik sohasi sub’yektlari o‘rtasida so‘rovnoma orqali ma’lumot to‘plandi», - deyiladi vazirlik bayonotida.
Marketpleys ofertasiga ko‘ra, fors-major sababli majburiyatlarni bajarmaslik holati yuzaga kelgan bo‘lsa, Wildberries javobgarlikdan ozod etiladi. Fors-majorga «to‘xtatib bo‘lmas kuchlar», tabiiy ofatlar, ifloslantiruvchi yoki zaharlovchi moddalarning chiqib ketishi, ish tashlashlar va boshqa favqulodda vaziyatlar kiradi.
18–22 iyul kunlari Wildberries’ning Kotovsk va Elektrostaldagi taqsimlash markazlari hamda Krasnodar va Nevinnomissk shaharlaridagi omborlari hujumga uchradi. Eng og‘ir oqibatlar Kotovskda qayd etildi -yetti nafar xodim halok bo‘ldi, yana 23 kishi shifoxonaga yotqizildi.
Elektrostal logistika majmuasiga dron bo‘laklari tushishi natijasida chiqqan yong‘in uch sutkada o‘chirildi.
22 iyul kechasi kompaniyaning Krasnodar va Nevinnomisskdagi omborlariga ham dronlar hujumi uyushtirildi. Krasnodarda o‘n kishi jarohatlandi, ulardan biri shifoxonada vafot etdi. Nevinnomisskda esa bir kishi shifoxonaga yotqizildi.
Hujumlardan so‘ng Wildberries logistika zanjirlari qayta tashkil etilganini va platforma odatiy rejimda ishlashda davom etayotganini bildirdi.
