Yangi tartibga muvofiq, fuqarolar xavfli ishlab chiqarish ob’yektlari hamda texnik qurilmalardan foydalanish jarayonida sodir etilgan huquqbuzarliklar haqidagi ma’lumotlarni Sanoat, radiatsiya va yadro xavfsizligi qo‘mitasiga foto va (yoki) videomateriallar ko‘rinishida taqdim etishi mumkin.
Taqdim etilgan materiallar vakolatli organ tomonidan belgilangan tartibda ko‘rib chiqiladi. Huquqbuzarlik holati tasdiqlangan taqdirda, uni aniqlashga hissa qo‘shgan shaxslarni rag‘batlantirish mexanizmi qo‘llaniladi.
Mazkur tartib xavfli ishlab chiqarish ob’yektlarida sanoat xavfsizligi talablariga rioya etilishini ta’minlash, ehtimoliy avariya va baxsiz hodisalarning oldini olish, shuningdek, jamoatchilik nazoratini kuchaytirishga xizmat qilishi kutilmoqda.
Mutaxassislar fikricha, fuqarolarning bunday jarayonlarga jalb etilishi xavfsizlik talablari ijrosi ustidan ta’sirchan jamoatchilik nazoratini shakllantirish, qoidabuzarliklarni erta aniqlash hamda ularning oqibatlarini bartaraf etish imkoniyatini oshiradi.
Yangi tartib 2026 yil 1 avgustdan kuchga kiradi.
