Milliy statistika qo‘mitasi ma’lumotlariga ko‘ra, joriy yilning yanvar–may oylarida mamlakat eksporti 12,6 mlrd AQSh dollariga yetgan.
Eksport tarkibida xizmatlar 4,6 mlrd dollar bilan eng yuqori ulushni qayd etdi. Mazkur yo‘nalishda o‘sish sur’ati o‘tgan yilning mos davriga nisbatan 34,9 foizni tashkil qildi.
Sanoat tovarlari eksporti 1,9 mlrd dollarga yetgan bo‘lib, 18 foizga oshdi. Turli xil tayyor buyumlar eksporti esa qariyb ikki barobar o‘sib, 1,1 mlrd dollarni tashkil qildi.
Shuningdek, kimyoviy vositalar va shunga o‘xshash mahsulotlar eksporti 1 mlrd dollar (+37,6 foiz), oziq-ovqat mahsulotlari va tirik hayvonlar eksporti ham 1 mlrd dollar (+9,1 foiz) bo‘lgan.
Hisobot davrida mineral yoqilg‘i, moylash materiallari va shunga o‘xshash mahsulotlar eksporti 660,7 mln dollarga (+10,1 foiz), mashinalar va transport asbob-uskunalari eksporti 536 mln dollarga (+38,2 foiz) yetdi.
Nooziq-ovqat xomashyosi (yonilg‘idan tashqari) eksporti 131,4 mln dollar (+17,1 foiz), ichimliklar va tamaki mahsulotlari eksporti 106,9 mln dollar (+41,3 foiz), hayvon va o‘simlik moylari, yog‘lar hamda mumlar eksporti esa 50,9 mln dollar (+90,1 foiz)ni tashkil qildi.
Ayni paytda, «boshqa tovarlar» toifasi bo‘yicha eksport hajmi 1,5 mlrd dollar bo‘lib, o‘tgan yilning mos davriga nisbatan 76,4 foizga kamaygan.
