«Ostorojno, Peterburg» Telegram-kanali 26 iyul kuni tegishli komissiya hisobotiga tayanib xabar berishicha, reydlar Sankt-Peterburgda yoshlar ko‘p to‘planadigan savdo markazlarida o‘tkazilishi ko‘zda tutilgan.
Ularda «Kontakt» davlat ijtimoiy markazi xodimlari hamda Rossiya IIVning Sankt-Peterburg va Leningrad viloyati bo‘yicha Ekstremizmga qarshi kurash markazi - «E» markazi vakillari ishtirok etishi aytilmoqda.
Xabarga ko‘ra, mutaxassislar yoshlar ko‘p to‘planadigan joylarni o‘rganib, «radikal kayfiyatdagi» o‘smirlarni aniqlashga harakat qiladi. Bunda ularning kiyimi va aksessuarlarida «norasmiy asotsial guruhlar»ga xos deb baholanadigan belgilarga ham e’tibor qaratilishi rejalashtirilgan.
Hisobotda qayd etilishicha, shunday toifaga kiritilgan o‘smir va yoshlar «deradikallashtirish va jamiyatga konstruktiv ijtimoiylashtirish» bo‘yicha profilaktik ishlarga jalb etiladi.
Ushbu ishlar «dolzarb tendensiyalar va chaqiriqlar»ni hisobga olgan holda amalga oshirilishi aytilgan.
Moskvada ham o‘smirlar ishtirokidagi reydlar haqida xabar berilgan
Bundan avval, iyul oyi boshida Moskva markazidagi Kitay-gorod hududida politsiya yoshlar va o‘smirlar to‘planadigan joylarda reyd o‘tkazgani haqida xabarlar tarqalgan edi.
3 iyul kuni Twitch platformasida to‘g‘ridan to‘g‘ri efir olib borayotgan Vitaliy ismli bloger Kitay-gorodda politsiya tomonidan ushlanganini bildirgan.
Uning aytishicha, u ko‘chada ketayotganda va politsiya avtozakiga qo‘l silkitganidan keyin ushlangan.
Bloger keyinchalik o‘z Telegram-kanalida ushlash vaqtida uning yuzi va oyoqlariga bir necha marta zarba berilganini iddao qilgan. Shuningdek, uning so‘zlariga ko‘ra, huquqni muhofaza qiluvchi organ xodimlaridan biri avtozak ichidagi yoshlarga nisbatan elektroshoker qo‘llagan.
Vitaliy «Ostorojno, novosti» Telegram-kanaliga politsiya bo‘limida ushlanganlarning telefonlari olib qo‘yilganini ham aytgan.
Uning so‘zlariga ko‘ra, politsiya xodimlari yoshlardan Kitay-gorodda nima qilayotgani, alkogol yoki giyohvand moddalar ta’siri ostida bo‘lgan-bo‘lmagani haqida so‘ragan. Ularning pasport ma’lumotlari yozib olingan va suratga tushirilgan.
Shundan so‘ng ularga nisbatan ma’muriy bayonnoma rasmiylashtirilmasdan qo‘yib yuborilgani aytilmoqda.
«Ostorojno, novosti» va «OVD-Info» boshqa ushlanganlar ham politsiya xodimlari tomonidan kuch ishlatilgani va elektroshoker qo‘llangani haqida bildirganini yozgan.
Kitay-gorodda janjallar ko‘paygani xabar qilingan
Iyun oyi oxirida Baza Telegram-kanali Moskvadagi Kitay-gorod ko‘cha janjallari tez-tez sodir bo‘ladigan joylardan biriga aylanganini xabar qilgan edi.
Kanal ma’lumotlariga ko‘ra, bir oy davomida mazkur hududda 20 ga yaqin mushtlashuv qayd etilgan.
Shu sababli politsiya Kitay-gorodda muntazam reydlar o‘tkazayotgani va ko‘ngilochar hamda spirtli ichimliklar sotiladigan muassasalar yaqinida navbatchilik tashkil etgani aytilgan.
