Sobiq futbolchi Zinedin Zidan Fransiya milliy jamoasining yangi bosh murabbiyi etib tayinlandi. Fransiya futbol federatsiyasi ushbu mutaxassis bilan to‘rt yillik shartnoma imzolagan.
Zidanga milliy jamoada avval ham o‘zi bilan birga ishlgan David Bettoni va Hamidu Msaidi yordam beradi. Murabbiylar shtabidan, shuningdek, jismoniy tayyorgarlik bo‘yicha murabbiy Gregori Dyupon va sobiq futbolchilar Faben Bartez hamda Bernar Diomed ham o‘rin olishi kutilmoqda.
Zidan bu lavozimda Dide Deshamni almashtirdi. Desham Fransiya termasini 2012 yildan buyon boshqarib kelayotgandi. Uning boshchiligida fransuzlar 2018 yilgi jahon chempionatida g‘olib chiqdi, bundan tashqari, 2016 yilgi Yevropa chempionati va 2022 yilgi jahon chempionatida ikkinchi o‘rinni egalladi. 2026 yilgi jahon chempionatida esa fransuzlar yarimfinalda Ispaniyaga yutqazdi, uchinchi o‘rin uchun bahsni Angliya milliy jamoasiga boy berdi.
Zinedin Zidan – futbol tarixidagi buyuk futbolchilardan biri, Fransiya milliy jamoasi safida jami 108 ta o‘yin o‘tkazib, jahon (1998) va Yevropa (2000) chempioni bo‘lgan, «Oltin to‘p» sohibi.
Faoliyati davomida «Kann», «Bordo», «Yuventus» va «Real» kabi klublarda to‘p surgan.
2006 yilgi jahon chempionati finalida Italiyaga qarshi o‘yin vaqtida Marko Materatssi bilan bog‘liq voqeadan keyin, futbolchilik faoliyatini yakunlagan.
U murabbiylik faoliyatini 2012 yilda «Real» akademiyasida boshlagan. 2016 yilda esa Rafael Benites o‘rniga «Real» bosh murabbiyi etib tayinlangan. Uning boshqaruvidagi ikki yarim yil mobaynida madridliklar klubi qatorasiga uch marta Chempionlar ligasida g‘olib chiqqan. Zidan bunday natijaga erishgan yagona murabbiydir. Bu vaqt oralig‘ida «Real» bir marta Ispaniya chempioni, bir marta mamlakat Superkubogi, ikki marta UYeFA Superkubogi sohibi bo‘lgan. 2019 yil martida Zidan «Real» bosh murabbiyligiga qaytadi va 2021 yil mayiga qadar ushbu lavozimda qoladi. Shundan buyon u hech qayerda ishlamayotgan va Fransiya milliy jamoasi taklifini kutayotgandi.
