Kun.uz 27 iyul kuni Moskva shahridagi qurilish maydonlaridan birida o‘tkazilgan reyd haqida xabar bergandi. Tahririyatga kelib tushgan videolarda migrantlar yerda cho‘kkalab yurishga majbur qilinganini ko‘rish mumkin. Ularga nisbatan bunday munosabatning sababi ma’lum emas, murojaat qiluvchilar reyd o‘tkazganlarning kimligini ham bila olishmagan. Qizig‘i, hech kimdan hech qanday hujjat talab qilinmay va tekshirilmay turib, migrantlarga shunday holatda yurish buyurilgan.
Migratsiya agentligi va Rossiyadagi diplomatik missiya holat yuzasidan o‘rganish ishlarini olib bormoqda. Reyd o‘tkazilgani tasdig‘ini topdi, voqea joyida qo‘shni davlatlar fuqarolari ham bo‘lgan. Kun.uz ga ma’lum qilinishicha, hujjatlar tekshiruvidan keyin olib ketilganlar Tojikiston fuqarolari hisoblanadi.
Agentlikning rasmiy munosabatida bildirilishicha, qurilish ob’yektida 320 nafardan ortiq xorijiy davlat fuqarolari, jumladan 70 ga yaqin o‘zbekistonliklar ishlaydi. Kun.uz ga taqdim etilgan foto va videolarda agentlik hamda O‘zbekistonning Moskvadagi elchixonasi vakillari ob’yektlarga borib, yurtdoshlarimiz bilan gaplashayotgani aks etgan.
Agentlik O‘zbekiston fuqarolariga murojaat qilib, reydlar va boshqa holatlar davomida mehnat huquqlari buzilgan bo‘lsa, qo‘rqmasdan bildirishlarini so‘radi. Zarur hollarda agentlik jamg‘armasi hisobidan 3000 AQSh dollarigacha advokat xizmatlari xarajatlari qoplanishi ham aytilgan.
Biroq Kun.uz bilan gaplashgan murojaatchilarga ko‘ra, e’lon qilingan videolardan keyin qurilishdagi ishchilarga bosim kuchaygan. Ularning telefonlari tekshirilib, xabar kim tomonidan tarqatilganini aniqlashga urinishmoqda. Shuningdek, ishchilarga ichkaridagi gapni tashqariga olib chiqmaslik ham buyurilgan.
Agentlik reyddan keyin olib ketilganlar orasida O‘zbekiston fuqarolari yo‘qligini aytmoqda, biroq tahqirlanganlar orasida yurtdoshlarimiz ham bo‘lgan. Holat yuzasidan yakuniy munosabat e’qon qilinishi aytildi.
