Yo‘l harakatini tashkil etish markazi mutaxassislari Buyuk ipak yo‘li ko‘chasining «To‘ra Buva» masjididan Salom ko‘chasigacha bo‘lgan qismida joylashgan 13 ta chorrahadagi svetoforlarning o‘zaro muvofiq ishlashini ta’minlab, «Yashil to‘lqin» tizimini ishga tushirdi.
Ma’lum qilinishicha, tizim ertalabki tirbandlik vaqtida shahar markazi tomon harakatlanayotgan transport oqimi uchun, kechqurun esa qarama-qarshi yo‘nalishda ishlaydi.
Svetoforlar faoliyatining sinxronlashtirilishi natijasida mazkur yo‘nalish bo‘ylab harakatlanish vaqti sezilarli darajada qisqargan. Xususan, «To‘ra Buva» masjididan Salom ko‘chasigacha bo‘lgan masofani bosib o‘tish vaqti o‘rtacha 8,5 daqiqadan 6 daqiqagacha, ya’ni 29 foizga kamaygan.
Qarama-qarshi yo‘nalish - Salom ko‘chasidan «To‘ra Buva» masjidigacha bo‘lgan qismida esa safar vaqti 10 daqiqadan 8 daqiqagacha, ya’ni 20 foizga qisqargan.
Mutaxassislarning ta’kidlashicha, «Yashil to‘lqin» tizimidan samarali foydalanish uchun haydovchilar Yo‘l harakati qoidalariga amal qilishi va belgilangan 40–60 km/soat tezlikda harakatlanishi lozim. Ana shunday holda chorrahalardan qizil chiroqda deyarli to‘xtamasdan o‘tish imkoniyati yaratiladi.
Ayni paytda Yo‘l harakatini tashkil etish markazi Toshkent shahrining aqlli svetoforlar o‘rnatilgan boshqa ko‘chalarida ham «Yashil to‘lqin» tizimini bosqichma-bosqich joriy etish bo‘yicha hisob-kitob va loyihalash ishlarini olib bormoqda.
