Zelenskiyning ta’kidlashicha, dastlabki ma’lumotlarga ko‘ra, gap KXDRda ishlab chiqarilgan ballistik raketa haqida ketmoqda. Shu bilan birga, u yakuniy xulosalar ekspertiza natijalari e’lon qilingach berilishini qayd etdi.
«Albatta, hali ekspertizalar o‘tkaziladi, barcha holatlar tekshiriladi. Ammo hozirgi ma’lumotlarga ko‘ra, bu - Shimoliy Koreya ballistik raketa sidir», - dedi Ukraina prezidenti.
Zelenskiy xalqaro hamkorlarni Rossiyaning navbatdagi zarbasini qoralash bilan cheklanmasdan, Ukrainaga havo hujumidan mudofaa tizimlari uchun raketa yetkazib berishga va Moskvaga nisbatan bosimni yanada kuchaytirishga chaqirdi. Uning fikricha, faqat shunday choralar Rossiyaning keyingi hujumlarini to‘xtatishi mumkin.
30 iyulga o‘tar kechasi Rossiya qo‘shinlari Ukraina shaharlariga, jumladan Kiyevga ham raketa hujumlari uyushtirdi. Dnipropetrovsk viloyatining Kriviy Rix shahri yaqinidagi Radushne qishlog‘ida ballistik raketa xususiy uyga kelib tushgan. Oqibatda bir oiladan olti kishi, jumladan 6 yoshli qizaloq hamda 11 va 17 yoshli ikki o‘g‘il bola halok bo‘lgan.
Bundan avval ham Zelenskiy Rossiya Shimoliy Koreya bilan harbiy hamkorlikni kengaytirishga intilayotganini bildirgan edi. Uning aytishicha, Moskva Pxenyandan yana 30 ming nafar harbiy xizmatchi olishni rejalashtirmoqda. Shuningdek, KXDR Rossiyaga ballistik raketa uchirish qurilmalarining yangi partiyasini yetkazib berishga tayyorlanayotgani haqida ham ma’lum qilingan.
Ukraina prezidenti Rossiya va Shimoliy Koreya o‘rtasidagi harbiy hamkorlikni Osiyo mintaqasi xavfsizligi uchun ham jiddiy tahdid deb baholadi. Uning fikricha, Moskva Pxenyanga zamonaviy urush tajribasini o‘zlashtirishda yordam bermoqda.
2024 yilda Rossiya va Shimoliy Koreya «har tomonlama strategik sheriklik» to‘g‘risidagi shartnomani imzolagan edi.
