O‘zbekistonda xizmat ko‘rsatgan yoshlar murabbiysi, taniqli kinoaktyor, rejissyor va pedagog Abdumannon Ubaydullayev 86 yoshida vafot etdi. Bu haqda O‘zbekiston Kinoarboblari ijodiy uyushmasi xabar berdi.
Kinoaktyor “Omad”, “So‘nggi lahza”, “Hijron”, “Nazar”, “Yigit yig‘lamasin”, “Aldangan ko‘ngil”, “Mehr” kabi ko‘plab badiiy filmlar va bir qancha milliy teleseriallarda rollar ijro etgan.
Ijodkor O‘zbekiston davlat san’at va madaniyat instituti “Ovoz rejissyorligi va operatorlik mahorati” kafedrasida talaba yoshlarga ta’lim berib kelayotgandi.
“Dramaturgiyada dard bormi, aktyorga ham ijro etish uchun imkon bor. Qanchalik rejissyor harakat qilmasin, dramaturgiya yaxshi bo‘lmasa, foydasi yo‘q. Shuning uchun ham dramaturgiya hozirgi kundagi asosiy muammolardan. Ba’zi aktyorlar yaxshi asar yozilguncha o‘tib ketishi ham mumkin”, degandi Abdumannon Ubaydullayev Kun.uz’ga bergan intervyusida.
