O‘zbekiston FVV Tataristonning Nijnekamsk shahrida ukrain droni zarbasi oqibatlari bo‘yicha qo‘shimcha ma’lumot berdi. Unga ko‘ra, halok bo‘lgan o‘zbekistonliklar soni 8 nafarni tashkil etmoqda, shuningdek, O‘zbekistonning yana bir necha fuqarosi jarohatlanib, shifoxonaga yotqizilgan.
Qayd etilishicha, ular qurilish korxonasida quruvchi bo‘lib ishlagan.
Mahalliy rasmiylarga ko‘ra, tungi hujum vaqtida dronlardan biri Nijnekamskdagi sanoat zonasi hududida ishchilar yashayotgan hostelga zarba bergan. Bu zarba oqibatida Tojikistonning ham ikki fuqarosi halok bo‘lgan.
Tatariston rahbari Rustam Minnixanov O‘zbekiston va Tojikiston prezidentlariga hamdardlik bildirib, telegramma yuborgan.
Ukraina qurolli kuchlari bosh shtabi 10-avgustga o‘tar kechasi Rossiyaning «harbiy salohiyatini pasaytirish doirasida» Ukraina mudofaa kuchlari bo‘linmalari «„Taneko“ neftni qayta ishlash zavodi (Nijnekamsk, Respublika Tatarstan, RF)»ni nishonga olgani, «ob’yektda yong‘in kelib chiqqani»ni ma’lum qilgan.
O‘zbekiston FVV xabarida prezident Shavkat Mirziyoyev topshirig‘iga muvofiq, bosh vazir o‘rinbosari Ochilboy Ramatov boshchiligida hukumat komissiyasi tashkil etilgani ma’lum qilingan.
Hukumat komissiyasiga hodisa oqibatida jabrlangan fuqarolarimizning holidan xabar olish va ularga barcha zarur yordam ko‘rsatish, halok bo‘lganlarni havo transportida maxsus reys orqali olib kelish va tegishli manzillarga yetkazish, shuningdek ularning oila a’zolariga har tomonlama ko‘maklashish vazifalari yuklatildi.
Maxsus ishchi guruh Rossiya Federatsiyasiga yuborilib, barcha zarur chora-tadbirlar amalga oshirilmoqda.
Jabrlangan O‘zbekiston Respublikasi fuqarolari to‘g‘risida tezkor ma’lumot olish uchun:
O‘zbekiston Respublikasining Qozon shahridagi Bosh konsulining +79656007979 telefon raqamiga;
Migratsiya agentligining Rossiya Federatsiyasidagi vakolatxonasining +79257508757, +9251270002 telefon raqamlariga murojaat qilish mumkin.
