Sochi rasmiylari shahar aholisi va sayyohlarni yoqilg‘i tanqisligi fonida shaxsiy avtomobillarda harakatlanishdan voz kechishga chaqirdi. Bunday chora-tadbirlar «yoqilg‘i quyish shoxobchalariga yuklamani kamaytirish va odatiy ish rejimiga qaytishni tezlashtirish» imkonini beradi, deyiladi shahar ma’muriyati bayonotida.
Yoqilg‘i quyish shoxobchalarida navbatlar paydo bo‘lgan taqdirda, haydovchilar yo‘l harakati qoidalariga rioya qilishi shartligi haqida ogohlantirilgan.
Bu chaqiriq shahar ma’muriyatida yoqilg‘i bilan bog‘liq vaziyat bo‘yicha o‘tkazilgan yig‘ilishdan so‘ng yangradi. Rasmiylar «logistikadagi buzilishlar tufayli» yirik yoqilg‘i quyish shoxobchalari operatorlari yoqilg‘i berishda limitlar joriy etganini e’lon qildi. Ba’zi yoqilg‘i quyish shoxobchalarida «yuzaga kelgan ajiotaj tufayli» jismoniy shaxslarga benzin sotishga cheklovlar joriy etilgan.
Sochi1.ru nashri yozishicha, shaharda uchinchi kundirki yoqilg‘i bilan bog‘liq muammolar kuzatilmoqda. Guvohlarning so‘zlariga ko‘ra, zapravkalar atrofida navbatlar 12 soatgacha cho‘zilmoqda, natijada yo‘llarda tirbandliklar yuzaga kelmoqda. Ayrim sayyohlar benzin yo‘qligi tufayli uyiga keta olmayapti.
Rossiyada Ukrainaning neft korxonalariga zarbalari tufayli yoqilg‘i inqirozi kuchaygan. 8-avgust kuni ukrain dronlari Krasnodar o‘lkasidagi Ilskiy neftni qayta ishlash zavodiga hujum qilgandi.
Yoqilg‘i inqirozi chuqurlashishi iyun oyi va iyulning birinchi yarmiga to‘g‘ri kelgandi. Bu davrda Rossiya regionlarida benzin sotuviga turli cheklovlar joriy etildi, odamlar yoqilg‘i quyish shoxobchalarida soatlab navbatda turishga majbur bo‘ldi. Shundan keyin Ukraina harbiylari e’tiborini neftni qayta ishlash zavodlaridan Wildberries marketpleysi omborlariga qaratdi, regionlarda yoqilg‘i sotuviga qo‘yilgan cheklovlar bekor qilinishi boshlandi.
Ammo so‘nggi kunlarda neftni qayta ishlash zavodlari bo‘ylab zarbalar yana faollashdi. «7×7» nashri baholashicha, kamida 15 ta regiondagi zapravkalarda navbatlar paydo bo‘lgan hamda AI-92 va AI-95 benzini yetishmovchiligi yuzaga kelgan.
