6-oktabr kuni Sochining Qora dengiz sohilidagi «Sirius» federal hududi akvatoriyasida neft tankeri yonib ketdi. Rossiya transport vazirligiga koʻra, kemaga ekipajsiz kater hujum qilgan. Liberiya bayrogʻi ostida suzuvchi tankerda boʻlgan 23 kishi evakuatsiya qilingan. Dastlabki maʼlumotlarga koʻra, «Aframaks Rio» nomli ushbu tanker Novorossiyskdan Hindistonga neft xom ashyosi olib ketayotgandi.
Yonayotgan kemadan chiqqan tutun ustuni bir necha kilometr masofadan koʻrinib turgan, Sochining markaziy qismida yashovchilar ham kuyindi hidini sezishgan. Sochi va «Sirius» maʼmuriyati tankerdagi yongʻin tufayli barcha plyajlarni yopgan, aholiga deraza va eshiklarni yopish, koʻchaga chiqqanda himoya niqobidan foydalanish, imkon qadar tashqariga chiqmaslik tavsiya qilindi.
Shu bilan birga, Sochi1.ru nashri yozishicha, Primorsk sohilida 6-oktabr kuni kechqurun ham odamlar sayr qilishda davom etgan, kafelar ishlab turgan. Shu kuni Sochida sirenalar yangramagan, xavf haqida ogohlantirish boʻlmagan.
7-oktabr kuni ertalab Rospotrebnadzor Sochi yaqinidagi tankerda roʻy bergan yongʻin tufayli Qora dengizda ifloslanish yoʻqligini, ammo vaziyatni kuzatish davom etayotganini maʼlum qildi. Sochi maʼmuriyati havodagi ifloslantiruvchi moddalarning ruxsat etilgan konsentratsiyasi chegaradan oshmaganini maʼlum qildi. Biroq plyajlar yopiqligicha qolmoqda.
9-sentabr kuni ham Sochi sohiliga Ukraina dengiz dronlari (RF mudofaa vazirligi terminologiyasi boʻyicha «ekipajsiz kater») hujum qilgandi. Oʻshanda qariyb 30 kishi jarohatlangan. Hujum xavfi haqida ogohlantirish berilgandi, ammo guvohlarning soʻzlariga koʻra, koʻplab dam oluvchilar avvaliga bunga eʼtibor bermagan va faqat portlashlardan keyingina qocha boshlagan.
