Ferrari eksklyuziv Special Projects dasturi doirasida amerikalik mijozning individual buyurtmasi asosida navbatdagi avtomobilni yaratdi. Yangilik CZ26 deb nomlandi: 26 raqami bu loyiha doirasida ishlab chiqarilgan 26-noyob avtomobil ekanini bildiradi.
CZ26’ning asosini Ferrari SF90 tashkil etadi, biroq asl modeldan deyarli hech qanday tanish kuzov elementi qolmagan. Old qismi balandroq va burchakliroq bo‘lgan, kuzov chiziqlari esa aniqroq va geometrik ko‘rinish olgan. Odatiy SF90 faralari o‘rnini old panjaraning butun eni bo‘ylab joylashgan ingichka yorug‘lik elementlari egallagan.
Dizaynerlar avtomobilning orqa qismi ko‘rinishini ham butunlay qayta ishladi. Tor chiroqlar o‘rniga yirik kvadrat shaklidagi bloklar o‘rnatilgan, markazdagi qo‘shaloq tutun chiqarish quvurlari esa saqlab qolingan. Bamperning o‘ziga xos V shakli ham yo‘qolib, uning o‘rnida yangi diffuzorli, yanada gorizontal pastki qism paydo bo‘lgan.
Ferrari vakillarining so‘zlariga ko‘ra, CZ26’ni yaratishda 1970-yillardagi Italiya sanoat dizaynidan ilhomlanilgan. Shu bilan birga, avtomobil retro uslubdan ko‘ra ko‘proq futuristik ko‘rinishga ega bo‘ldi va uning ba’zi yechimlari haqiqatan ham ayrim zamonaviy konsept-karlarni yodga soladi.
SF90’ning texnik jihozlari deyarli o‘zgarishsiz qolgan. Karbon kuzov ostida ikkita turbokompressorli 4,0 litrli V8 dvigateli va uchta elektr motor ishlaydi, ularning umumiy quvvati 986 ot kuchini tashkil etadi. CZ26 joyidan 100 km/soat tezlikka 2,5 soniyada erishadi, maksimal tezligi esa soatiga 328 km ga teng.
Salon ham SF90 arxitekturasini saqlab qolgan, ammo yangi mato va karbon elementlar bilan boyitilgan. Shu bilan birga, kuzovdagi o‘zgarishlar jiddiy muhandislik ishlarini talab qildi: Ferrari sovutish tizimi, avtomobil tubi, uyurma generatorlari, old havo pardalari, orqa spoyler va diffuzorni qayta ishlab chiqdi.
Ferrari CZ26’ning narxini oshkor qilmayapti. Special Projects avtomobillarini yaratishga taxminan ikki yil vaqt ketadi va bu jarayonda buyurtmachi barcha bosqichlarda bevosita ishtirok etadi. Shu sababli, bunday individual Ferrari’ning narxi millionlab dollarga yetishi mumkin.
