Afsonaviy bokschi Rufat Risqiyev 76 yoshida olamdan o‘tdi. Bu haqda Milliy olimpiya qo‘mitasi matbuot kotibi Zafar Imomxo‘jayev ma’lum qildi.
Rufat Risqiyev o‘zbek boksining eng mashhur vakillaridan biri bo‘lib, sport olamida «Toshkent yo‘lbarsi» nomi bilan tanilgan.
U 1974-yilda boks bo‘yicha jahon chempioni bo‘lgan. 1976-yilgi Olimpiya o‘yinlarida esa kumush medalni qo‘lga kiritgan. Shu tariqa, Risqiyev Olimpiya o‘yinlari va jahon chempionatlarida shohsupaga ko‘tarilgan ilk o‘zbek bokschisi sifatida tarixga kirgan.
Sportchi faoliyati davomida xalqaro maydonda ham qator muvaffaqiyatlarga erishgan. Xususan, AQSh, Kuba, Avstriya, sobiq Yugoslaviya va Ispaniyada o‘tkazilgan xalqaro turnirlarda g‘olib chiqqan.
Rufat Risqiyev sportchilik faoliyatidan keyin ham boks sohasida ishlashni davom ettirgan. U Markaziy Osiyodagi ilk xalqaro toifadagi professional boks hakami bo‘lgan.
O‘zbek sporti rivojiga qo‘shgan hissasi uchun Rufat Risqiyev qator davlat mukofotlari bilan taqdirlangan. Jumladan, u «Hurmat Belgisi», «Buyuk xizmatlari uchun» va «El-yurt hurmati» ordenlariga sazovor bo‘lgan.
Rufat Risqiyevning jahon va Olimpiya ringlaridagi muvaffaqiyatlari o‘zbek boksi tarixida muhim o‘rin egallaydi. Uning sportdagi natijalari keyingi avlod bokschilari uchun katta maktab va o‘rnak bo‘lib qoldi.
