Italiya politsiyasi mamlakat shimolidagi muzeydan joriy yil mart oyida o‘g‘irlangan fransuz rassomlari Per Ogyust Renuar, Pol Sezann va Anri Matissning asarlarini topdi.
Parma politsiyasi rahbari Andrea Palyaroning 14-avgust kuni ma’lum qilishicha, o‘g‘irlangan san’at asarlari jinoyat ishi bo‘yicha gumondorlardan birining uyidan aniqlangan.
Tergov doirasida Moldovaning to‘qqiz nafar fuqarosi gumon qilinmoqda. Dastlabki ma’lumotlarga ko‘ra, ularning besh nafari kartinalarni o‘g‘irlashda bevosita ishtirok etgan bo‘lishi mumkin.
Gap Renuarning ijodining so‘nggi davriga mansub «Baliqlar» asari, Sezannning qalam va akvarelda ishlangan «Gilosli natyurmort» hamda Matissning «Terrasadagi odaliska» akvarel asari haqida bormoqda.
Ularning taxminiy bozor qiymati mos ravishda 3 million yevro, 6 million yevro va 20 ming yevro atrofida baholanmoqda. Shu tariqa, topilgan uchta asarning umumiy qiymati 9 million yevrodan oshadi.
Kartinalar mart oyi oxirida Parma yaqinida joylashgan san’atshunos va kolleksioner Luiji Manyani nomidagi fondning xususiy kolleksiyasidan o‘g‘irlangan edi.
Manyani-Rokka fondi muzeyida Yevropa tasviriy san’atining noyob namunalari saqlanadi. Kolleksiyadan Titsian, Albrext Dyurer, Piter Paul Rubens va Fransisko Goyya kabi mashhur rassomlarning asarlari ham o‘rin olgan. Muzey Italiyadagi eng muhim xususiy badiiy kolleksiyalardan biri hisoblanadi.
Avvalroq tarqalgan ma’lumotlarga ko‘ra, yuzlarini kapyushon bilan yashirgan o‘g‘rilar muzeyning kirish eshigini buzib ochgan. Ular bino ichida bor-yo‘g‘i uch daqiqa bo‘lib, uchta qimmatbaho asarni olib qochgan.
O‘g‘irlikdan so‘ng Manyani-Rokka fondi hodisani oldindan puxta rejalashtirilgan jinoyat deb atagan. Fond ma’lumotiga ko‘ra, videokuzatuv tizimi ishlagani, politsiya va qo‘riqlash xizmati tezkor harakat qilgani sabab jinoyatchilar muzeydagi boshqa qimmatbaho asarlarni olib ketishga ulgurmagan.
