Grek kompaniyasi boshqaruvidagi Skiros neft tankeri Qora dengizda, Novorossiysk yaqinida uchuvchisiz uchish apparati hujumiga uchradi. Bu haqda Bloomberg 17-avgust kuni vaziyatdan xabardor manbaga tayanib xabar berdi.
Ma’lumotlarga ko‘ra, tanker hujumdan oldin Kaspiy quvur konsorsiumining Novorossiysk yaqinidagi terminalida Rossiyada qazib olingan neft partiyasini bortiga yuklagan.
Hujum 16-avgust kuni sodir bo‘lgan.
Bloomberg ushbu hodisani Rossiyaning Ukrainaga qarshi urushi neft tashish yo‘nalishlariga ta’sir ko‘rsatayotganining navbatdagi misoli sifatida baholagan. Agentlik ma’lumotiga ko‘ra, KQK terminali orqali jahon bozoriga yetkazib beriladigan neft global ta’minotning taxminan 2 foizini tashkil etadi.
KQK terminali, asosan, Qozog‘istonda qazib olingan va eksport uchun mo‘ljallangan neftni yuklashda foydalaniladi. Biroq manbaning ta’kidlashicha, dron hujumiga uchragan Skiros tankeriga yuklangan xomashyo aynan Rossiyada qazib olingan neft bo‘lgan.
Skiros bir vaqtning o‘zida 1 million barrelgacha neft tashish imkoniyatiga ega.
Bloomberg hisob-kitoblariga ko‘ra, KQK terminali orqali eksport qilinadigan umumiy neft hajmining 5–10 foizi Rossiya nefti hissasiga to‘g‘ri keladi.
KQK hududida uch hafta ichidagi birinchi hujum
Skiros tankeri bilan bog‘liq hodisa KQK terminali hududida so‘nggi uch hafta ichida qayd etilgan birinchi dron hujumi bo‘ldi.
Iyul oyida terminalga bir necha bor dronlar bilan zarba berilgan va bu uning faoliyatida uzilishlarga olib kelgan edi. KQK Qozog‘iston neftini jahon bozoriga yetkazib berishda muhim ahamiyatga ega bo‘lgani sababli terminal ishidagi muammolar Qozog‘istondagi ayrim konlarda neft qazib olish hajmini qisqartirishga ham olib kelgan.
Iyul oxirida Kaspiy quvur konsorsiumi xavfsizlikka tahdidni kamaytirish hamda ehtimoliy neft to‘kilishi oqibatida atrof-muhitga zarar yetishining oldini olish maqsadida terminal faoliyatini vaqtincha to‘xtatish imkoniyatini ham ko‘rib chiqqan.
Biroq yakunda KQK ishni davom ettirishga qaror qilgan.
Tankerni boshqarayotgan grek kompaniyasining bildirishicha, Skirosʼga qilingan hujum oqibatida ekipaj a’zolaridan hech kim jabrlanmagan. Neft sizib chiqishi yoki atrof-muhit ifloslanishi ham qayd etilmagan.
