Siyosatchi bu haqda Oq uy oldida jurnalistlarga aytib o‘tdi.
«Ha, men shunday qilaman», - dedi Tramp.
«Kim Chen In bilan munosabatlarimiz yaxshi. Unda juda qudratli 57 ta yadro quroli bor. Bunga yo‘l qo‘ymaslik kerak edi, ammo bu qurollar unda bor. Men uni juda yaxshi bilaman. Bizda aqlli prezident bor ekan, uning ishlari yaxshi bo‘ladi. Agar ahmoq prezident bo‘lsa, uning ishlari yaxshi bo‘lmaydi», deb qo‘shimcha qildi AQSh prezidenti.
The Wall Street Journal nashrining yozishicha, Tramp Pxenyan yadroviy dasturi bo‘yicha muzokaralarni qayta tiklash uchun shu yil kuzda uchrashmoqchi.
Tramp va Kim Chen In Amerika yetakchisining birinchi prezidentlik davrida uch marta - 2018-yilda bir marta va 2019-yilda ikki marta uchrashgan. Tomonlar KXDR yadroviy infratuzilmasini yo‘q qilish shartlari bo‘yicha kelisha olmagach, denuklearizatsiya bo‘yicha muzokaralar kelishuvsiz yakunlangan edi.
Shu hafta boshida Tramp Shimoliy Koreya yetakchisi muloqot taklifiga javob berganini aytib, «Kim Chen In menga doim katta hurmat bilan munosabatda bo‘lgan», deb qo‘shimcha qildi.
