2018-2024 yillarda Liberiya vitse-prezidenti lavozimida faoliyat olib borgan Juel Xouard-Teylor giyohvandlik moddalari noqonuniy savdosi bo‘yicha xalqaro tergov doirasida hibsga olindi.
Xabar qilinishicha, Xouard-Teylor 19-avgust kuni mamlakat poytaxti Monroviyadagi xalqaro aeroportga ketayotgan vaqtida qo‘lga olingan. Unga narkosavdo bo‘yicha ayblov e’lon qilingan.
Joriy yil iyulida Liberiyada Yevropaga jo‘natilishi rejalashtirilgan qiymati 317 mln dollarlik 4 tonna kokain musodara qilingandi.
Mamlakat hukumati ushbu ish doirasida qo‘lga olinganlarga shafqat qilinmasligini bildirgan.
Xouard-Teylor 1997-2003 yillarda Liberiya prezidenti bo‘lgan Charlz Teylorning sobiq turmush o‘rtog‘i hisoblanadi. Charlz Teylor ayni vaqtda harbiy jinoyatlarda ayblanib Britaniyadagi qamoqxonalardan birida 50 yillik jazo muddatini o‘tamoqda.
