Davlat xavfsizlik xizmati maʼlumotiga koʻra, tadbirlar giyohvandlik vositalari, psixotrop va kuchli taʼsir qiluvchi moddalarning noqonuniy aylanmasiga qarshi kurashish doirasida oʻtkazilgan.
Andijon viloyatining Izboskan tumanida DXX viloyat boshqarmasi, Chegara qoʻshinlari va viloyat Bojxona boshqarmasi vakillari hamkorligida Toshkent shahri tomon harakatlanayotgan Lacetti toʻxtatib tekshirilgan.
Avtomashinani Toshkent viloyatining Bekobod shahrida yashovchi, 1986-yilda tugʻilgan, muqaddam sudlangan shaxs boshqarib ketayotgan boʻlgan. Tekshiruvda mashina salonida 1400 dona «Regapen» kuchli taʼsir qiluvchi dori vositasi borligi aniqlangan.
Ikkinchi tezkor tadbir Qoʻqon shahrida DXXning Fargʻona viloyati boshqarmasi, bojxona va ichki ishlar organlari xodimlari hamkorligida oʻtkazilgan.
Unda 1976-yilda tugʻilgan mahalliy fuqaroning sumkasidan 1092 dona «Regapen» hamda 200 gramm gashish topilgan. Ular ashyoviy dalil sifatida olib qoʻyilgan.
Yana bir holatda Margʻilondan Qoʻqon tomon harakatlanayotgan VAZ-21017 avtomobili Uchkoʻprik tumani hududida toʻxtatib tekshirilgan.
Qoʻqon shahrida yashovchi, 1985-yilda tugʻilgan shaxs boshqaruvidagi mashina salonidan 99 dona «Tropikamid» kuchli taʼsir qiluvchi dori vositasi aniqlangan. Dorilar protsessual tartibda rasmiylashtirib olingan.
Hozirda har uchala holat boʻyicha mazkur shaxslarga nisbatan jinoyat ishlari qoʻzgʻatilgan. Tergov harakatlari davom etmoqda.
