Agentlik maʼlumotlariga koʻra, ushbu davrda 89 ta yirik narkojinoiy guruh faoliyatiga chek qoʻyilgan. Ulardan 1,4 tonna anʼanaviy va 61,7 kilogramm sintetik giyohvandlik vositalari, shuningdek, 4,6 million dona psixotrop va kuchli taʼsir qiluvchi moddalar olib qoʻyilgan.
Shuningdek, 15 ta onlayn narkodoʻkon faoliyati tugatilgan. Narkotiklar savdosi bilan shugʻullangan, jami 630 mingdan ortiq obunachi va aʼzoga ega 1 911 ta internet resursi bloklangan. Ularning 609 tasi Telegram boti, 1 004 tasi yopiq, 298 tasi esa ochiq kanal, guruh va chatlardan iborat.
Tezkor-profilaktik tadbirlar natijasida 2 tonna 708 kilogramm narkotik va kuchli taʼsir qiluvchi moddalarning noqonuniy muomalasiga chek qoʻyilib, aholi orasida tarqalishining oldi olingan. Shundan 2 tonna 398 kilogrammini narkotiklar, 310 kilogrammini kuchli taʼsir qiluvchi moddalar tashkil etgan. Bundan tashqari, 3 633 dona psixotrop modda noqonuniy muomaladan olingan.
Sintetik narkotiklarni tayyorlashda foydalaniladigan 10,5 tonna prekursor ham musodara qilingan.
Sakkiz oy davomida 18 ta gʻayriqonuniy narkolaboratoriya aniqlangan. Ularda saqlangan jami 1 tonna 40 kilogramm giyohvandlik vositalari, kuchli taʼsir qiluvchi moddalar va prekursorlar noqonuniy muomaladan olingan.
