Latviyada Tallin shahridagi Milrem Robotics mudofaa kompaniyasi foydalanadigan binoga qasddan o‘t qo‘yishda gumonlangan uch kishi qo‘lga olindi. Ulardan ikki nafari hibsga olingan.

Bu haqda 19-avgust kuni Estoniya davlat prokurori Gardi Anderson ma’lum qildi. Uning so‘zlariga ko‘ra, tergov sodir bo‘lgan voqea diversiya bo‘lishi mumkinligini istisno qilmayapti.

«Yaqin vaqt ichida uchinchi gumonlanuvchini ham hibsga olish to‘g‘risida iltimosnoma kiritish bo‘yicha qaror qabul qilamiz», - dedi prokuror.

Gumonlanuvchilarning ismlari va fuqaroligi hozircha oshkor etilmagan. Latviya va Estoniya huquqni muhofaza qiluvchi organlari ularni Estoniya tomoniga topshirish masalasi ustida ish olib bormoqda.

Yong‘in 14-avgustdan 15-avgustga o‘tar kechasi Milrem Robotics foydalanadigan binoda sodir bo‘lgan. Hodisa oqibatida hech kim jabrlanmagan.

Milrem Robotics harbiy maqsadlarga mo‘ljallangan uchuvchisiz yer usti transport vositalari va robotlashtirilgan tizimlarni ishlab chiqaradi. Kompaniya mahsulotlaridan Ukrainada ham foydalaniladi.

Kompaniya rahbari Kuldar Vaarsi Reuters agentligiga yong‘in ishlab chiqarish jarayoni va yetkazib berish zanjirlariga ta’sir qilmaganini ma’lum qilgan. Uning aytishicha, Milrem Robotics 2026-yil oxiriga qadar Ukrainada o‘zining 200 dan ortiq robotlashtirilgan tizimi bo‘lishini rejalashtirmoqda.

Rossiyaga aloqadorlik versiyasi tekshirilmoqda

Estoniya bosh vaziri Kristen Mixal 18-avgust kuni rasmiylar yong‘inga Rossiya aloqador bo‘lishi mumkinligi haqidagi versiyani ham tekshirayotganini ma’lum qildi.

«Agar bu harakatdan maqsad Estoniyani qo‘rqitish, odamlarimiz orasida nizo keltirib chiqarish yoki bizni Ukrainani qo‘llab-quvvatlashdan voz kechishga majburlash bo‘lgan bo‘lsa, u holda bu maqsadga erishilmaydi», - dedi Mixal.

Shu bilan birga, Estoniya rasmiylari hozircha Tallindagi Milrem Robotics binosiga o‘t qo‘yilishiga Rossiya aloqadorligini tasdiqlovchi dalillarni jamoatchilikka taqdim etmagan.

Rossiyaning Estoniyadagi elchixonasi esa Reuters agentligining ushbu masala yuzasidan izoh berish haqidagi so‘roviga javob bermagan.