Germaniyaning BMW kompaniyasi Chendudagi avtosalonga Xitoy bozori uchun maxsus ishlab chiqilgan iX3 krossoverining uzaytirilgan versiyasini olib bordi. CarNewsChina xabariga koʻra, avtomobil uch xil komplektatsiyada 269 900 yuandan 339 900 yuangacha boʻlgan narxda sotuvga chiqarilgan (2026-yil 21-avgust holatiga koʻra 476 mln - 600 mln soʻm).
“Xitoycha” BMW iX3’ning yevropalik “ogʻa-ini”sidan asosiy farqi gʻildirak bazasining uzaytirilgani (3 metrdan ortiq) va mahalliylashtirilgan dasturiy taʼminotidir. Tashqi koʻrinishidan modellar deyarli farqlanmaydi. Uzaytirilgan krossover tor “burun teshiklari”ga ega soxta radiator panjarasi, yirik orqa diffuzor, yarim yashirin eshik tutqichlari va alohida orqa chiroqlar bilan jihozlangan.
Salonda jismoniy tugmalar soni minimal darajaga keltirilgan, asboblar paneli vazifasini esa old oyna boʻylab toʻliq joylashgan uzunchoq ekran bajaradi. Shuningdek, avtomobil gʻayrioddiy shakldagi ulkan multimedia tizimi displeyi bilan jihozlangan - u haydovchi tomoniga biroz qiyaroq oʻrnatilgan.
Krossoverning Xitoy uchun moʻljallangan bazaviy versiyasi 265 ot kuchiga ega bitta elektromotor bilan jihozlangan. Bunday BMW iX3 100 km/soat tezlikka 6,8 soniyada erisha oladi. Bir zaradda bosib oʻtadigan masofasi 630 km ni tashkil etadi.
Shuningdek, modelning umumiy quvvati 374 ot kuchiga ega ikkita elektr dvigatelli modifikatsiyasi ham mavjud. Bir zarad bilan avtomobil qariyb 700 km masofani bosib oʻtishi mumkin. Uning 100 km/soatgacha tezlanishi 5,6 soniyani talab etadi. Krossoverning top versiyasi 469 ot kuchi quvvatga ega. Bir zaradda avtomobil 900 kmgacha masofani bosib oʻta oladi.
