Ichki ishlar vazirligida huquqbuzarliklarning oldini olish, jamoat xavfsizligini ta’minlash va aholi osoyishtaligini mustahkamlash bo‘yicha prezident belgilagan vazifalar ijrosiga bag‘ishlangan videoselektor yig‘ilishi o‘tkazildi.
Unda Prezident administratsiyasi mas’ullari, Vazirlar Mahkamasining mahalla va xotin-qizlar masalalari bo‘yicha mutasaddilari, Ichki ishlar vazirligi, Milliy gvardiya, Bosh prokuratura va Favqulodda vaziyatlar vazirligi rahbariyati, shuningdek, hududlardagi hokimlar va jamoat xavfsizligi uchun mas’ul rahbarlar ishtirok etdi.
Yig‘ilishda prezidentning tegishli qaror va topshiriqlarida belgilangan vazifalarning hududlardagi ijrosi tahlil qilindi. Xususan, huquqbuzarliklarni keltirib chiqarayotgan sabab va shart-sharoitlarni barvaqt aniqlash, ularni bartaraf etish hamda profilaktik tadbirlarni samarali tashkil qilish masalalari muhokama qilindi.
Huquqbuzarlik sodir etishga moyil shaxslar bilan manzilli ishlashni kuchaytirish, mahallalarda xavfsiz muhit yaratish va mas’ul idoralar o‘rtasidagi hamkorlikni mustahkamlash bo‘yicha vazifalar belgilab berildi. Aniqlangan kamchiliklarni bartaraf etish va ijro intizomini kuchaytirish yuzasidan mas’ullarga tegishli ko‘rsatmalar berildi.
Yig‘ilishda tashkiliy masala ham ko‘rib chiqildi. Prezidentning tegishli qarori bilan polkovnik Timur Ismoilov O‘zbekiston ichki ishlar vazirining birinchi o‘rinbosari - Jamoat xavfsizligi departamenti boshlig‘i lavozimiga tayinlandi. Shu munosabat bilan u Surxondaryo viloyati IIB boshlig‘i lavozimidan ozod etildi.
Yangi rahbar zimmasiga jamoat xavfsizligini ta’minlash, huquqbuzarliklar profilaktikasi va jinoyatchilikning barvaqt oldini olish tizimini takomillashtirish vazifalari yuklatildi. Shuningdek, tizimni raqamlashtirish, ichki ishlar organlarining boshqa davlat idoralari va jamoat tashkilotlari bilan hamkorligini kuchaytirish hamda jamoat tartibini saqlashning zamonaviy usullarini keng joriy etish talab qilindi.
Yig‘ilishda O‘zbekiston davlat mustaqilligining 35 yilligi munosabati bilan o‘tkaziladigan bayram tadbirlarida xavfsizlikni ta’minlash masalasiga ham alohida e’tibor qaratildi.
Ichki ishlar vaziri general-leytenant Aziz Toshpo‘latov har bir xizmatning vazifasi aniq belgilanishi, kuch va vositalar oldindan hisob-kitob qilinishi hamda mas’ullar hududlardagi vaziyatni to‘liq nazorat qilishi lozimligini ta’kidladi.
Bayram tadbirlari o‘tkaziladigan hududlarda jamoat tartibini saqlash, fuqarolar xavfsizligini ta’minlash, transport va piyodalar harakatini tartibga solish, odamlar gavjum joylarda huquqbuzarliklarning oldini olish hamda ehtimoliy favqulodda holatlarga yo‘l qo‘ymaslik bo‘yicha kompleks choralar belgilandi.
Videoselektorda hududlardagi tayyorgarlik holati ham tahlil qilinib, mas’ul rahbarlarning axborotlari eshitildi. Ularga har bir bayram tadbiri o‘tkaziladigan manzilda xavfsizlik choralarini qayta ko‘rib chiqish, zarur kuch va vositalarni safarbar etish, mas’ul xodimlarni biriktirish va aniqlangan kamchiliklarni tadbirlar boshlanguniga qadar bartaraf etish topshirildi.
Shuningdek, ta’lim muassasalari atrofida xavfsiz muhitni ta’minlashga alohida e’tibor qaratilib, fuqarolarning bayram kunlarini osoyishta o‘tkazishi va bolalarning yangi o‘quv yilini xavfsiz sharoitda boshlashi uchun zarur choralarni ko‘rish vazifasi qo‘yildi.
