Polsha Ichki xavfsizlik agentligi (ABW) 20-avgust kuni Varshavada Ukraina fuqarosi Sergey P. qo‘lga olingani haqida ma’lum qildi. U Ukraina mudofaa sanoatining nomi oshkor etilmagan vakiliga suiqasd uyushtirishga uringanlikda gumon qilinmoqda.
Ma’lum qilinishicha, 63 yoshli Sergey P. aslida 5-avgust kuni ushlangan.
ABW bayonotiga ko‘ra, suiqasd Ukraina Kiyev viloyatining Irpen shahrida amalga oshirilishi rejalashtirilgan. Gumondor ehtimoliy qurbonning avtomobili tagiga portlovchi qurilma o‘rnatgan.
Tergov versiyasiga ko‘ra, avtomobil masofadan turib portlatilishi kerak bo‘lgan. Biroq mexanizm ishlamagan va portlash sodir bo‘lmagan. Shundan keyin gumondor Ukrainadan chiqib, Polshaga yo‘l olgan.
Polsha tergov organlari Sergey P. Rossiya maxsus xizmatlari buyurtmasi asosida harakat qilgan deb hisoblamoqda. Varshava sudi uni noqonuniy yo‘l bilan olingan portlovchi moddalardan foydalanib odam o‘ldirishga urinish ayblovi bo‘yicha uch oy muddatga hibsga olgan.
Rossiya maxsus xizmatlari bilan bog‘liq boshqa ishlar
So‘nggi vaqtlarda Polshada Rossiya maxsus xizmatlari bilan aloqadorlikda gumon qilingan shaxslarni qo‘lga olish holatlari haqida tez-tez xabar berilmoqda.
13-avgust kuni Polshada Rossiya fuqarosi ushlangani ma’lum bo‘lgan. U AQSh va Ukraina fuqaroligiga ega shaxsni o‘ldirishga tayyorgarlik ko‘rishda gumon qilingan.
RMF FM radiostansiyasi ma’lumotiga ko‘ra, ushlangan shaxs Donbassda tug‘ilgan bo‘lib, ukrainalik reper Albert Vasilev - Kyivstonerʼga suiqasd uyushtirishni rejalashtirgan.
Avvalroq Rossiya Federal xavfsizlik xizmati (FXX) musiqachini Moskva viloyatidagi strategik korxonaga keng ko‘lamli dron hujumini tashkil etishda ayblagan edi. Kyivstoner esa bu ayblovlarni qat’iyan rad etgan.
Bundan tashqari, iyul oyida Polshada 18 yoshli Ukraina fuqarosiga ham ayblov e’lon qilingan. Tergov versiyasiga ko‘ra, u Rossiya maxsus xizmatlarining topshirig‘i bilan Kiyev va Varshava o‘rtasidagi munosabatlarda keskinlik keltirib chiqarishga qaratilgan diversiya harakatlarini amalga oshirgan.
Polsha prokuraturasi ma’lumotiga ko‘ra, gumondor 2024–2025-yillarda jami 47 ta jinoiy harakat sodir etgan. Ular orasida yodgorliklarni, jumladan, Ukraina isyonchilar armiyasi (UIA) qurboni bo‘lgan polyaklarga bag‘ishlangan memoriallarni tahqirlash holatlari ham bor.
