«Vajnyye istorii» nashri maʼlumotiga koʻra, 21-avgust, juma kuni kechqurun Gelenjik va uning atrofida benzin zaxiralari toʻliq tugagan. Arxipo-Osipovka qishlogʻidagi soʻnggi yonilgʻi quyish shoxobchasida ham AI-92 va AI-95 benzini qolmagan.
Kun davomida ayrim AOQSH oldida yuzlab avtomobillar navbatda turgan. «Ostorojno, novosti» Telegram-kanali maʼlumotiga koʻra, baʼzi haydovchilar benzin olish uchun 16 soatdan ziyod vaqt davomida navbat kutishga majbur boʻlgan.
Bundan avval shunga oʻxshash xabarlar Sochi va Krasnodar oʻlkasining boshqa aholi punktlaridan ham kelib tushgan edi. Sochi maʼmuriyati shahardagi yonilgʻi bilan bogʻliq vaziyatni keskin deb baholab, mahalliy aholi va sayyohlarni shaxsiy avtomobillarda safar qilishdan imkon qadar tiyilishga chaqirgan.
Rossiyada yoqilgʻi tanqisligining yangi toʻlqini avgust oyining oʻrtalarida boshlangan. 10–15-avgust kunlari mamlakatning kamida oltita hududida benzin sotish boʻyicha cheklovlar qayta joriy etilgan yoki avvalgi cheklovlar kuchaytirilgan.
«Izvestiya» gazetasi «GdeBenz» maʼlumotlariga tayanib xabar berishicha, 18-avgust holatiga koʻra, Rossiyadagi AYoQShning atigi 28,1 foizida benzin va dizel yonilgʻisi mavjud boʻlgan. Bir hafta avval esa bu koʻrsatkich 41 foizni tashkil etgan.
Manbada Rossiyadagi yonilgʻi inqirozi Ukraina Qurolli kuchlarining neftni qayta ishlash zavodlariga muntazam zarbalari bilan bogʻlangan. Vaziyat may oyi oxirida keskinlashgani aytilmoqda.
Yonilgʻi sotish boʻyicha turli cheklovlar Rossiyaning 40 dan ortiq hududida rasman joriy etilgan.
