Jetour Xitoyning Chendu shahridagi avtosalonda yangi Traveller 7 yoʻltanlamasini taqdim etdi. Autohome nashrining yozishicha, ayni paytda avtomobil uchun oldindan buyurtmalar ochilgan. Band qilish uchun 777 yuan (taxminan 800 ming soʻm) toʻlash talab etiladi.
Dizayndagi asosiy oʻziga xoslik - yorqin chiziq bilan birlashtirilgan dumaloq diodli kunduzgi chiroqlarga ega gʻayrioddiy old optikadir. Umuman olganda, model uslubi avtosanoatda «toʻrtburchak» kuzovlar trendini boshlab bergan Britaniyaning Land Rover Defender modelini yodga soladi.
Avtomobil boʻrtma kapot va toʻrtburchak shaklidagi massiv havo yutgich bilan bezatilgan. Traveller 7 tomining ulkan reylinglari orasidan panoramali lyuk oʻrin olgan.
Qizigʻi shundaki, tizer suratlarda avtomobilning yukxona eshigiga «yoʻltanlamas» koferi oʻrnatilgan edi. Biroq «jonli» nusxaning orqa qismida oddiy zaxira gʻildiragi koʻzga tashlanadi.
Interyer T2 yoʻltanlamasi bilan yagona konsepsiyada yaratilgan: ixcham raqamli asboblar paneli, harakatlanish rejimlarini oʻzgartirish uchun moʻljallangan shayba, simsiz quvvatlash moslamasi, orqa koʻrinish kamerasi va katta multimedia-koʻngilochar tizimi ekrani. Shunisi eʼtiborga loyiqki, salonda ancha-muncha jismoniy tugmalar va «eski uslubdagi» sozlagichlar saqlab qolingan.
Model Xitoyda ikki litrli benzin dvigateli bilan sotuvga chiqariladi. Agregat sakkiz pogʻonali «avtomat» uzatmalar qutisi bilan birgalikda ishlaydi. Ulanma - toʻliq. Shuningdek, tarkibida 1,5 litrli dvigatel va uchta elektromotor boʻlgan, quvvati 781 ot kuchiga teng gibrid versiyasi ham mavjud. Umumiy yurish masofasi - 1,4 ming km.
