Ukrainadagi mojaroga tinch yoʻl bilan yechim topish boʻyicha Rossiyaga yetkazilayotgan takliflar “ekzotik” va “nomoqbul”, dedi prezident Vladimir Putin jurnalist Pavel Zarubin bilan suhbatda. U Moskva tinchlik muzokaralariga faqat mavjud realliklar asosidagina tayyorligini taʼkidladi.
“Bizga yetkazilayotgan takliflar baʼzan, aytish mumkinki, ekzotik xususiyatga ega va qabul qilib boʻlmaydi. Biz tinchlik borasidagi muloqotga doim tayyormiz, biroq faqat mavjud realliklarga asoslangan holda”, - dedi davlat rahbari.
Uning soʻzlariga koʻra, Rossiya qurolli kuchlarining javob choralari Ukraina iqtisodiyotining eng muhim tarmoqlaridagi vaziyatni “jiddiy darajaga” olib chiqmoqda, shu bois Kiyev rasmiylari vositachilar orqali oʻzlari qoʻzgʻatgan ushbu vaziyatdan chiqishga urinmoqda.
Moskvaga tinchlik boʻyicha aynan qanday “ekzotik” takliflar kelib tushgani haqidagi savolga Putin “tafsilotlarga berilishni” istamasligini, biroq bunday takliflar avval ham bildirilganini, hozirgi vaziyatda esa ular “oʻziga xos tarzda taqdim etilayotganini” aytdi. “Ammo oldinga oʻtib, ehtimoliy kelishuvlarga nima asos boʻlishi mumkinligini aytishga hali erta”, - deb qoʻshimcha qildi u.
