Rossiya prezidenti Vladimir Putin VGTRK propagandachisi Pavel Zarubinga bergan «intervyu»sida Kiyevning maqsadi – Rossiya iqtisodiyotiga zarar yetkazish ekani, Rossiya bunga mos ravishda javob qaytarishini aytib oʻtdi. Quyida u bildirgan fikrlar qisqartirilgan va tahrirlangan shaklda keltiriladi. Toʻliq matnni Kreml saytida oʻqish mumkin.
Rossiya ukrainlarning 40 kunlik «taʼsir koʻrsatish operatsiyasi»ga javoban Ukraina boʻylab zarbalarni kuchaytirdi. Ukraina qurolli kuchlari Rossiyaning fuqarolik obyektlari va logistikasiga yopirilma zarbalar yoʻllagandi. Ammo yakuniy natija Ukraina kutganining teskarisi boʻldi.
Kiyev iqtisodiyotimizga zarar yetkazishni oʻz oldiga maqsad qilib qoʻygandi. Uning oʻzi Pandora qutisini ochib, jinni shishadan chiqarib yubordi. Endi oʻzingizning shusiz ham bazoʻr nafas olayotgan iqtisodiy tarmoqlaringizga javob beriladi. Qishloq xoʻjaligi sohasi ham shu jumladan. Bizning logistikamizni buzmoqchi boʻldingizmi? Javob kuttirmaydi. Qabul qilib oling.
Rossiyaning Ukraina boʻylab zarbalari Ukraina qurolli kuchlarining Rossiya boʻylab zarbalariga qaraganda samaraliroq, oʻz vaqtida berilmoqda va vayronkorroq boʻlmoqda. Rossiya zarbalari frontdagi jangchilarimizga ham yordam bermoqda.
Bizga kelib tushayotgan takliflar baʼzan, aytish mumkinki, ekzotik xususiyatga ega va qabul qilib boʻlmaydigan takliflar. Biz tinchlik borasidagi muloqotga doim tayyormiz, biroq faqat mavjud realliklarga asoslangan holda.
- Rossiya harbiylari 22-avgustga oʻtar kechasi Ukrainaning Dnipropetrovsk oblasti Kriviy Rih shahri boʻylab yoʻllagan zarbalar vaqtida «Solnechnaya galereya» savdo markazi vayron boʻldi. Ukraina rasmiylarining soʻnggi maʼlumotlariga koʻra, zarba oqibatida 16 kishi halok boʻlgan, 130 kishi, jumladan, 23 nafar bola yaralangan. Qutqaruvchilar toʻqqiz ming metr kvadrat maydonni qamrab olgan yongʻinni oʻchirishgan. Hujum oqibatlarini bartaraf etish va bedarak yoʻqolganlarni qidirish ishlari davom etmoqda.
