Samarqand viloyati Kattaqoʻrgʻon tumanida 3 yoshli bola enaga qaramogʻida boʻlgan vaqtida zoʻravonlikka uchragani aytilmoqda. Hozir bola ogʻir ahvolda jonlantirish boʻlimida davolanmoqda (tahririyatda bolaning ayanchli ahvolda ekanini koʻrsatuvchi videolar mavjud).
Maʼlum boʻlishicha, bolaning onasi taxminan ikki oy davomida farzandini enaga qaramogʻiga qoldirib, oʻzi ishlagan. Oila asli Narpay tumanidan. Bolaning otasi xorijda mehnat qiladi, onasi esa oilaviy kelishmovchiliklar sabab Narpaydagi uyidan ketib, farzandini Kattaqoʻrgʻonda enagaga qoldirgan holda kafeda idish yuvuvchi boʻlib ishlagan.
Kun.uz’ga taqdim etilgan videolarda bolaning tanasida kuyishga oʻxshash ogʻir jarohatlar va koʻkarishlar aks etgan. Shuningdek, bolaga nisbatan shafqatsiz munosabat qilingani koʻrinadi. Voqeadan xabar topgan qoʻshnilar ichki ishlar organlariga murojaat qilgan. Shundan soʻng bola shifoxonaga olib borilgan.
«3 yashar bolaning badanida sogʻ joyi yoʻq»
Bolaning yaqinlaridan birining aytishicha, voqeadan keyin huquqni muhofaza qiluvchi organlarga bir necha bor murojaat qilingan. Ammo uning soʻzlariga koʻra, holat boʻyicha tibbiy ekspertiza ham tayinlanmagan.
«3 yashar bolaning badanida sogʻ joyi yoʻq. Qoʻllarini sim bilan bogʻlab qoʻygan, sim izlaridan qolgan jarohatlar yiringlab ketgan hattoki. Qizib turgan elektr plita ustiga bolani oʻtqazgan, orqasi juda chuqur, qattiq kuygan. Odam bolasi shunday qiladimi? Hozir bola operatsiya qilinib, oʻz terisidan olib kuygan joylarni yamashdi shifokorlar. Lekin shu vahshiylikni qilgan odamga biror chora koʻrilmadi shuncha kundan beri. Na ichki ishlar, na prokuratura qaramadi. Narpayga yozsam, Kattaqoʻrgʻonda boʻlgan – ularga yozing deydi. Kattaqoʻrgʻonga yozsam jimjit. Oxiri Samarqand viloyat prokuraturasiga yozdik, ulardanam biror najot boʻlmadi. Bir haftadan oshyaptiki, hamma jim», - deydi u.
Bolaning yaqinlari hozir uning davolanishi bilan birga, unga kim va qanday sharoitda zoʻravonlik qilganiga huquqiy baho berilishini kutmoqda.
Bu birinchi holat boʻlmasligi mumkin
Voqea guvohlaridan biri enaga avval ham boshqa bolalarga qaraganini va uning telefonida bolalarga nisbatan zoʻravonlik aks etgan videolar boʻlganini aytmoqda. Uning soʻzlariga koʻra, ayol bolaning sochini pinset bilan yulib, bu holatni telefonga tasvirga olgan.
«Shunchalik azob berganki, bolaning sochini pinsetda bittalab yulib shaxsiy telefoniga videoga olgan. Bu ayol avval ham bolalarga qaragan uyida, boshqa bolalarniyam shunday holga solgan. Lekin hech kim indamagan, telefonida bolachalarning kaltak oqibatida qonga belangan holatlari tasvirga olingan. Farzandidan xabar olgani kelgan ota-onalarga bolasi ularni koʻrsa yigʻlashini aytib darvozani ochmas ekan. Baʼzi ota-onalar shuning uchun ham bolasining ahvolidan bexabar boʻlgan», - deydi guvoh.
