Obyekt Bryunig massivida 100 metrdan chuqurroqda barpo etilmoqda, deb xabar berdi Bild nashri. Bryunig massivi Shveysariyaning markaziy qismida joylashgan.
Loyiha mualliflari mulkni «deyarli har qanday ehtimoliy tahdiddan» - har qanday hujum yoki falokatdan himoya qilishni koʻzlamoqda. Shu maqsadda omborlar togʻ massivining ichkarisida joylashtiriladi. Loyiha ortida tadbirkor Tomas Gasserga tegishli Shveysariyaning Brünig Mega Safe kompaniyasi turibdi. Qurilish 2026-yilning yanvar oyida boshlangan. Kompaniya vakiliga koʻra, yuqori xavfsizlik hududidagi dastlabki ishlar allaqachon yakunlangan. Keyingi bosqichda esa omborxonalarga kirishni taʼminlaydigan portal quriladi.
«Xavfsizlik darajasi Shveysariya Milliy banki omborlarida qoʻllaniladigan darajaga mos boʻlishi kerak», - degan edi Gasser Shveysariyaning RTS telekanaliga bergan intervyusida.
Dastlabki omborlarni 2028-yilda bitkazish kutilmoqda. Togʻ massivida jami 25 tagacha xona yaratish rejalashtirilgan. Ulardan biridan 99 yil muddatga foydalanish huquqi qiymati 1 million yevroga yetishi mumkin. Omborlar mulkini uzoq muddat saqlashga ehtiyoj sezadigan milliarderlar uchun moʻljallangan.
Yerosti majmuasiga kirish bir necha bosqichli nazorat orqali amalga oshiriladi. Gasserning soʻzlariga koʻra, odam avval shlyuzdan oʻtishi kerak boʻladi, shuningdek, qoʻshimcha tekshiruvlar ham koʻzda tutilgan. Kompaniyaning bildirishicha, omborlarda deyarli har qanday qimmatbaho buyumlarni saqlash mumkin boʻladi. Cheklovlar faqat giyohvand moddalar va portlovchi moddalarga taalluqli.
