Oliy taʼlim muassasalariga oʻqishga qabul qilingan abituriyentlar va talabalar kontrakt toʻlovini amalga oshirish uchun contract.edu.uz platformasi orqali onlayn ariza beradi.
Shartnomani rasmiylashtirish jarayonida «Shartnoma turini tanlash» bandida ikki tomonlama yoki uch tomonlama shartnomadan birini belgilash talab etiladi.
Ikki tomonlama shartnoma OTM va abituriyent yoki talaba oʻrtasida tuziladi.
Agar kontrakt yoki super-kontrakt puli talaba tomonidan oʻz mablagʻlari hisobidan toʻlansa, ikki tomonlama shartnoma tanlanishi kerak.
Shuningdek, kontrakt puli ota-onaning ish haqi yoki boshqa shaxsiy mablagʻlari hisobidan toʻlanadigan boʻlsa ham ikki tomonlama shartnoma rasmiylashtiriladi.
Bank orqali taʼlim krediti olib kontrakt pulini toʻlashni rejalashtirgan talabalar ham ikki tomonlama shartnomani tanlaydi.
Uch tomonlama shartnoma esa OTM, abituriyent yoki talaba hamda homiy tashkilot oʻrtasida tuziladi.
Yaʼni kontrakt yoki super-kontrakt pulini talabaning oʻzi yoki ota-onasi emas, balki biror korxona yoki tashkilot homiy sifatida toʻlab bersa, uch tomonlama shartnoma tanlanadi.
Bunda shartnomani rasmiylashtirish jarayonida homiy tashkilotning STIR raqamini kiritish talab etiladi.
Shuningdek, talabalarga bir yillik kontrakt toʻlovini toʻrt qismga boʻlib toʻlash imkoniyati berilgan. Belgilangan tartibga koʻra, dastlabki 25 foiz miqdoridagi toʻlovni 1-oktabrga qadar amalga oshirish talab etiladi.
