Prezident farmoni bilan turizm sohasini qoʻllab-quvvatlashga qaratilgan qator imtiyozlarning amal qilish muddatlari uzaytiriladi.
Xususan, uch, toʻrt va besh yulduzli mehmonxonalar qurilishi uchun subsidiyalar berish muddati 2029-yil 1-yanvarga qadar davom etadi.
Mehmonxona va boshqa joylashtirish vositalarining mol-mulk soligʻi hamda yer soligʻi stavkalariga nisbatan 0,1 koeffitsiyentni qoʻllash muddati 2030-yil 1-yanvarga qadar uzaytiriladi.
Bundan tashqari, turizm sohasi subyektlari tomonidan import qilinadigan avtobus, elektrobus va mikroavtobuslarni bojxona bojidan ozod qilish imtiyozi 2028-yil 1-yanvarga qadar amal qiladi.
Farmonga muvofiq, 2027-yil 1-yanvardan Oʻzbekiston rezidenti hisoblangan turoperatorlarning xorijiy sayyohlarga koʻrsatgan xizmatlariga qoʻshilgan qiymat soligʻining nol stavkasi qoʻllanadi.
Shu sanadan boshlab yulduzli mehmonxona qurilishi uchun subsidiya olishda mehmonxona toifasini tasdiqlash uchun xorijiy kompaniyalarning xulosasini olish talabi ham bekor qilinadi.
Hujjat bilan yirik miqdordagi tovar va xizmatlar uchun hisob-kitob qilish tartibiga ham oʻzgartish kiritilmoqda. Qiymati bazaviy hisoblash miqdorining 400 baravaridan oshadigan tovar va xizmatlar uchun toʻlovlar faqat bank kartalari yoki elektron toʻlov tizimlari orqali amalga oshirilishi belgilandi.
Avvalgi tartibda naqd pulsiz hisob-kitob qilinishi shart boʻlgan bunday toʻlovlar uchun chegara 25 mln soʻm etib belgilangan edi.
