Xitoy rasmiylari Himolay mintaqasidagi koʻchki va suv toshqinlaridan keyin Tibet hududida 23 davlatning 261 nafar chet el fuqarosi bedarak yoʻqolganini maʼlum qildi. Tibetning oʻzida esa qurbonlar soni 16 kishiga yetdi.
Xitoyning Tibet avtonom viloyati rasmiylari bedarak yoʻqolgan xorijliklarning eng koʻpi – 104 nafari Nepal fuqarolari ekanini bildirdi. Shuningdek, Hindistonning 49 nafar, Latviyaning 33 nafar, AQShning 18 nafar fuqarosi va 15 nafar britaniyaliklar ham bedarak yoʻqolganlar qatorida. Pekin rasmiylari xorijiy diplomatik vakolatxonalarni bu holatdan xabardor qilgan.
Chorshanba kuni muzlikning qulaganidan beri Xitoy tomoni ilk bor bedarak yoʻqolganlarning fuqaroligi boʻyicha batafsil maʼlumot berdi. Shanba oqshomiga kelib Gyirong okrugida 16 kishi halok boʻlgan va jami 546 kishi bedarak yoʻqolgan.
Nepalda esa qurbonlar soni ortib bormoqda
Nepal favqulodda vaziyatlar boshqarmasi maʼlumotlariga koʻra, chegaraning ularga qarashli qismida kamida 734 kishining jasadi topilgan. Shuningdek 2 498 kishi bedarak yoʻqolgan, ularni qidirish ishlari uchun qariyb 20 ming nafar qutqaruvchilar va harbiylar safarbar etilgan. Bugunga qadar 7 514 kishi qutqarilgani aytilmoqda.
Reuters’ning yozishicha, Nepal umumiy qutqaruv ishlari uchun xorijiy yordamga ehtiyoj yoʻqligini bildirmoqda. Biroq Tashqi ishlar vazirligi matbuot kotibi Lok Bahodur Chxetri, mamlakat - tunnellar ichidagi qutqaruv ishlari, jasadlarni saqlash uchun muzlatkichli kameralar va DNK testlari oʻtkazish kabi yoʻnalishlarda yordamga muhtoj ekanini aytgan.
