Holandda yubiley, Obameyangda rekord. Kun oʻyinlari
|12:54 / 06.09.202620 00110 min
«Siti» qatorasiga uch gʻalabadan keyin yakkapeshqadamga aylanib oldi, lekin bugun «Arsenal» va «Chelsi» oʻyinidan keyin vaziyat oʻzgarishi mumkin. Yevropa futbolida shanba oqshomida roʻy bergan asosiy voqealar, oʻyinlardagi gollar va turnir jadvallaridagi vaziyat.
Mavsumni juda tetik boshlagan «Nyukasl» («Liverpul» bilan 2:2, «Tottenhem» ustidan 2:0 hisobidagi gʻalaba) «Bornmut» bilan oʻyinda kutilganidek jiddiy muammolarga duch keldi: «olchalar» bungacha qatorasiga sakkizta oʻzaro oʻyinda «qargʻalar»ga yutqazmagan, bu oʻyinlarning teng yarmida gʻalaba qozongandi. Bu safar ham mehmonlar oʻz vaziyatlaridan maksimum natija chiqarib olishdi. Hisobni ochgan Taverne olisdan yoʻllangan zarbadan keyin rikoshet orqali yoʻnalishini oʻzgartirgan toʻpga barchadan birinchi boʻlib yetib bordi, keyin esa uning qanotdan uzatmasi Tiauning avtogoliga olib keldi. Faqat ikkinchi goldan keyingina mezbonlar oʻziga kelishdi va Barns olis «toʻqqizlik»ni aniq nishonga olib, jamoasini oʻyinga qaytardi. Oʻyin oxirida esa aynan uning uzatmasidan keyin Jeykob Remsi hisobni tenglashtirdi. «Nyukasl» yengilmas jamoa boʻlib qolmoqda.
Frenk Lempard boshqaruvidagi «Koventri» APLga qaytishini qatorasiga ikki magʻlubiyat bilan boshlagandi, «Etihad»da ham ushbu salbiy seriyani yakunlashning imkoni boʻlmadi. Shu bilan birga, chempionshipdan chiqqan ushbu jamoani butkul ilojsiz ahvolda qoldi deb boʻlmaydi. Avvaliga Husanovning darvozabonga uzatmasi golga aylanib ketishiga bir baxya qoldi, Donnarumma soʻnggi soniyada darvoza chizigʻini toʻliq kesib oʻtmagan toʻpga yetib borishga ulgurdi. Keyingi daqiqada esa Avoniyi darvozabon bilan yakkama-yakka vaziyatga chiqib bordi, ammo toʻgʻri zarba berolmadi. Faqat boʻlim oʻrtalaridan oʻtganida Holand Semenyo oʻng qanotdan darvozabon hududiga oshirgan toʻpni bosh bilan raqib darvozasiga kiritib yubordi.
Mavzuga oid
Erling endi APLda 2022/23 yillar mavsumidan buyon boshda urgan gollari sonini 20 taga yetkazib oldi – bu davr oraligʻida unga eng yaqin natija 16 gol. Ammo kunning asosiy raqami – Holand klublar miqyosidagi 368 oʻyinda 300-golini urishi boʻldi. Shuningdek, u APLda gol urgan jamoalar soni endi 24 taga yetdi – bu «Siti» tarixidagi eng yuqori koʻrsatkich.
Donnarumma esa ikkinchi boʻlimda ham qahramonlik koʻrsatishda davom etdi va yaqin masofadan yoʻllangan zarbani (bu vaziyatda ham Husanov xatoga yoʻl qoʻygandi) yuzi bilan toʻsib qoldi. Yakunda Enso Mareska shogirdlari kichik hisobdagi ustunlikni saqlab qolishdi va qatorasiga uchinchi gʻalabadan keyin turnir jadvalida peshqadamga aylanib olishdi. Vaziyat yakshanba kuni «Arsenal» va «Chelsi» oʻrtasida kechadigan derbidan keyin oʻzgarishi mumkin – hozirda ikki jamoada ham 6 tadan ochko bor.
Ispaniya: «Atletiko»da yirik magʻlubiyat, Obameyang ikkinchi yoshligini oʻtkazmoqda
«Atletik» – «Atletiko» 3:0 Gollar: Uilyams, 46 (1:0). Navarro, 48 (2:0). Sanset, 90 (3:0) «Atletik»: Simon, Y. Alvares (Paredes, 46), Lyaport, Berchiche, Areso, Ruis de Galarreta (Hauregisar, 60), Gerenabarrena, Sanset, Uilyams (Guruseta, 76), Navarro (Lui-Jan, 66), Inyaki Uilyams (Berenger, 66) «Atletiko»: Oblak, Gansko, Pubil, Grimaldo, Liorente, Barrios, Yulmann (Romero, 59), Lukman (Ortis, 58), Simeone (Koke, 59), Li Kan In (X. Alvares, 59), Baena (Kardozo, 76) Ogohlantirish: Li Kan In, 39
«Atletiko»ning mavsumdagi ilk magʻlubiyati oʻta ogʻriqli boʻldi. «San-Mames»da madridliklar oxirgi bor 2013-yil yanvarida bunday yirik hisobda yutqazgandi, oʻshanda bilbaoliklar jamoasini Marselo Biyelsa boshqarardi. Ikkinchi boʻlim har ikki jamoa uchun ham unikal chiqdi. Basklar bungacha hech qachon tanaffusdan keyin uch daqiqa ichida ikki gol urishga muvaffaq boʻlmagandi, «matraschilar» esa bunday oraliqda ikki gol oʻtkazib yubormagandi.
Barchasi aka-ukalar uyushtirgan gol bilan boshlandi. Inyaki Uilyamsning zarbasidan keyin toʻp himoyachining oyogʻiga tekkan holda darvozabon hududida havoga koʻtarildi, u yerda turgan Niko esa toʻpni boshda darvozaga yoʻnaltirib yubordi. Keyingi hujumda esa Robert Navarro oʻz mahoratini namoyish etdi – u tezkor hujumni toʻpni chap oyogʻiga olgan holda burchakka aniq zarba yoʻllash bilan yakunlab qoʻydi. 90-daqiqada Sanset poytaxtdan kelgan mehmonlarni uzil-kesil taslim qiluvchi golni urdi. Yozgi transferlar oynasining soʻnggi kunigacha «Barselona»ga ketishidan umid qilib oʻtirgan Hulian Alvares esa 59-daqiqada zaxiradan oʻyinga qoʻshildi, ammo «Atletiko» oʻyinini kuchaytira olmadi.
«Vilyarreal» oʻtgan mavsum oxirida koʻp yillik murabbiyi Marselino Toral bilan xayrlashgandi: tomonlar yangi shartnoma hamda klubni rivojlantirish boʻyicha qator masalalarda kelisha olmagandi. Shundan keyin jamoa boshqaruviga Inigo Peres tayinlandi, ammo bahorda «Rayo Valekano»ni Konferensiyalar ligasi finaliga olib chiqqan ushbu mutaxassisning ishlari joyida emas. Mavsum startidagi uchta safar oʻyinida atigi ikki ochko qoʻlga kiritilgandi. Muxlislar oʻz stadionida nihoyat gʻalaba qozonishidan umid qilayotgandi va barchasi yaxshi boshlangandi. Pepe toʻpni oldinga chiqib kelgan darvozabon ustidan oshirib tashlagan holda hisobni ochdi. Ammo birinchi boʻlim oxirida «Deportivo» hisobni tenglashtirdi, la-korunyaliklarning yangi kumiriga aylangan Obameyang ushbu golga hammualliflik qildi.
Ikkinchi boʻlim ham «Vilyarreal»ning hujumlari bilan boshlandi. Ammo mezbonlar koʻplab vaziyatlardan foydalana olmadi va oʻyin durangga qarab keta boshladi. Faqat mehmonlar safida Adama Traore avtogol urib qoʻyganidan keyingina muxlislar yengil tin olishdi. Ammo barchasi hali oldinda edi. Uch daqiqa oʻtib darvozabon Luiz Junior qoʻpol xatoga yoʻl qoʻydi va yaqin burchagidan gol olib chiqdi. Oʻyinning soʻnggi daqiqalari oʻtayotganida esa Obameyang himoyachilardan qochib ketib, navbatdagi golini urdi. Gabonlik ushbu 37 yoshli hujumchi La ligani zabt etmoqda. U XXI asrda yangi jamoasi safidagi toʻrt oʻyinda ham gol yoki assist muallifi boʻlgan eng katta yoshli futbolchiga aylandi. Uning saʼy-harakatlari bilan la liga debyutanti boʻlgan «Depor» 8 ochko toʻplagan holda 4-oʻrinda bormoqda, «Vilyarreal» ikki ochkosi bilan 16-oʻrinda.
«Borussiya» Zinshaymda juda ogʻir oʻyin oʻtkazdi. Kobel jamoani bir necha bor qutqardi, birinchi boʻlim davomida Mane jarohat oldi. «Hoffenhaym» esa tanaffus arafasida haqli ravishda hisobni ochdi. Ikkinchi boʻlim boshlangach, vaziyat yanada ogʻirlashdi: mezbonlar dastlab oʻta qulay vaziyatni qoʻldan chiqardi, ammo biroz oʻtib markaziy zonadagi toʻp yoʻqotilishidan keyin dortmundliklar ikkinchi golni ham oʻtkazib yuborishdi.
Dortmundda bu oʻyinni qutqarib qolish uchun hech qanday imkoniyat yoʻqdek koʻringandi, ammo mehmonlar besh daqiqa ichida ikki gol urib, muvozanatni tiklashdi. Barchasi Anton toʻpni egallab olib, darvozabon bilan yakkama-yakka vaziyatga chiqib ketgan Girassini golli uzatma bilan taʼminlashidan boshlandi. Keyin esa Kobel ushbu hujumchini oldinga boshladi. Toʻpga yetib borgan Girassi hisobni tenglashtiruvchi golni urgan Fabiu Silvaga assistentlik qildi. Oʻyin oxirida esa Niko Kovach mezbonlar futbolchisining avtogoli evaziga safardan uch ochko bilan qaytadigan boʻldi.
«Shalke-04» – «Bavariya» 0:0 «Shalke-04»: Karius, Hasan Kuruchay (Veber, 74), T. Bekker, Katich, Gozens (V. Bekker, 65), Dina Ebimbe (Mertjan Oyxon, 65), Tanaka, Al-Favziy, Aushish (Kenan Karaman, 84), Lyubichich (Fotsar, 74), Silla «Bavariya»: Noyer, Upamekano, Ta, Deyvis, Laymer, Kimmih, Pavlovich (Bishof, 74), Braun (Keyn, 46), Dias, Karl (Musiala, 57), Saybari (Olise, 57) Ogohlantirishlar: Dina Ebimbe, 31. Katich, 73 – Upamekano, 35. Pavlovich, 72
Dastlabki ikki turdagi asosiy sensatsiya – «Bavariya» Gelzenkirhenda golsiz durang qayd etishi boʻldi. Bundesligaga qaytgan «Shalke» bu durangni gʻalabadek nishonladi, buni toʻgʻri tushunish mumkin: ushbu jamoa 2017-yildan buyon myunxenliklar bilan oʻyinlarda birorta ham ochko qoʻlga kirita olmayotgandi. Mezbonlar jonbozlik va intizom bilan oʻynashdi, oʻyin qahramoni esa Karius boʻldi. Ushbu darvozabon 87-daqiqada Keynning toʻqqizlikka yoʻllagan zarbasini qaytarib, hal qiluvchi seyvni amalga oshirdi. Tabiiyki, bu mezbonlar darvozasi qarshisidagi yagona golli vaziyat emasdi, oʻyin davomida Braun va Dias ham juda qulay imkoniyatlarga ega boʻlishgandi. Ammo shu kuni hech kimga gol urish nasib etmadi.
