Alyor Saidmirzayev 35 yildan beri Fargʻona shahar Tez tibbiy yordam boʻlimida feldsher boʻlib ishlaydi. Kasbining issiq-sovugʻi, pastu-balandini tatigan qahramonimiz sohaning bugungi kundagi holati, ishdagi masʼuliyat hamda odamlarning shifokorlarga boʻlayotgan munosabati haqida soʻzlab berdi. “Chaqiruvga borganimizda baʼzan bizni haqorat qilishadi, kezi kelganda kaltaklashadi ham, lekin barchasiga chidaymiz”, – deydi u.
Inson boshida har xil vaziyatlar boʻlishi mumkin. Hayot kutilmagan holatlar, past-balandliklar va sinovlardan iborat. Toʻsatdan bemor boʻlganimizda eng avvalo 103 raqamiga qoʻngʻiroq qilamiz. Chaqiruvga asosan feldsherlar yetib keladi va birinchi yordamni koʻrsatadi.
Respublika tez tibbiy yordam markazi Fargʻona filialida 35 yildan beri faoliyat olib borayotgan feldsherlar Alyor Saidmirzayev, Mavjuda Hasanova va uning haydovchisi bilan suhbatlashdik.
Tarsaki tushganda koʻzimdan yosh chiqib ketdi...
“Ishimizda xalovat yoʻq. Masʼuliyatimiz esa katta. Har xil vaziyatlar boʻladi. Manzilga borganimizda kech kelding, deb haqorat qilishadi. Iloji boricha ogʻir-bosiqlik bilan bemor va yaqinlariga yaxshi gapirib, er-xotin janjal qilgan boʻlsa yarashtirib, dori-darmonlarni qilganimizdan keyin, holat yaxshi tomonga oʻzgaradi. Koʻp holatlarda bemorning asabi buzilganda tutqanoq ham boshlanishi mumkin, yordam koʻrsatamiz...
Asabiy odamlar juda koʻp. Odamlar uchun bir daqiqa bir soatdek tuyuladi. Yetib borganimizda baqiradi, chaqiradi, kech kelding deb xaqorat qiladi, lekin chidaymiz... Iloji boricha ularga ogʻir-bosiqlik bilan muomala qilishga harakat qilamiz. Birinchi yordam koʻrsatilib bemorning qon bosimi yoki tana harorati tushgandan keyin ular minnatdorchilik bildirishadi.
Har xil holatlar boʻladi. Bir chaqiruvga borganimizda erkak kishiga birinchi yordam koʻrsatildi. Barcha yordamlarga qaramasdan bemorning qon bosimi tushmadi. Ilojsizlikdan bemorni nosilkaga oldik. Shu payt qayerdandir it kelib, yelkamni tishlab oldi. Oʻsha kuni kimgadir birinchi yordam koʻrsatishga borganman, lekin oʻzimga birinchi yordam koʻrsatildi. Ishimni yigʻishtirib qoʻyib bir muddat davolanishga majbur boʻldim.
Kunlarning birida chaqiruv boʻldi. Borishimizga 80 yoshga kirgan chol yuragi ushlab, yaʼni infarktdan oʻlib qoldi. Xotini erim oʻldimi, deb mendan soʻradi. Endi xolajon, Xudo rahmat qilsin, umri shuncha ekan, qoʻlimizdan kelgani shu deganimni bilaman yuzimga bir shapaloq kelib tushdi. Koʻzimdan beixtiyor yosh chiqib ketdi. Oʻshanda uy bekasining qilgan ishi juda ogʻir botgan. Oʻtirib olib yigʻlaganman”, – deydi feldsher Alyor Saidmirzayev.
