Ijtimoiy tarmoqlarda Toshkent shahrida maktab oʻquvchisi temir braslet yutishga majburlangani haqidagi xabar tarqaldi. Poytaxt MMTB holat yuzasidan rasmiy munosabat bildirdi.
Maʼlum qilinishicha, holat 2-sentabr kuni Yashnobod tumanidagi 151-maktabda sodir boʻlgan. 3-sinf oʻquvchisi T.M. hojatxonasiga chiqqanda, yuqori sinf oʻquvchilari tomonidan uning ogʻziga nomaʼlum jism solingani haqida uning onasi maʼlumot bergan.
Oradan 3 kun oʻtib, ona oʻgʻlining sogʻligi yomonlashganligi sababli uni shifoxonaga olib borgan. Tibbiy tekshiruvlar jarayonida bolaning ichki qismida nomaʼlum jism borligi aniqlangan.
Onaning aytishicha, oʻgʻli voqea haqida oʻz vaqtida xabar bermagan. Rentgen qilingandagina uning ichida yot jism borligi maʼlum boʻlgan. Oqibatda bola 3 soat davom etgan ogʻir jarrohlik amaliyotini boshdan kechirgan.
Boshqarmaga koʻra, hozirgi vaqtda oʻquvchiga barcha tibbiy yordamlar koʻrsatilgan hamda uning ahvoli qoniqarli holatda.
Huquqni muhofaza qiluvchi tashkilotlar holat yuzasidan tergovga qadar tekshiruv ishlari olib bormoqda. Yakuni boʻyicha qoʻshimcha maʼlumot berilishi bildirilgan.
