Bolalar ombudsmani kotibiyatiga Yashnobod tumanida istiqomat qiluvchi bir guruh fuqarolardan murojaat kelib tushgan.
Murojaatda fuqarolar qo‘shnisi - 1989-yilda tug‘ilgan A.T.ning 2023-yilda tug‘ilgan o‘g‘li A.I.ga nisbatan muntazam jismoniy zo‘ravonlik sodir etayotganini bildirgan. Shuningdek, ayol bolaga uxlatuvchi dori vositasini berib, uni doimiy ravishda qarovsiz va parvarishsiz qoldirishi aytilgan.
Bolalar ombudsmanining rasmiy so‘rovi asosida holat ichki ishlar organlari hamda Ijtimoiy himoya milliy agentligi tomonidan o‘rganildi.
O‘rganish natijasida bolaga nisbatan sodir etilgan muttasil tazyiq va qiynash xatti-harakatlari yuzasidan Jinoyat kodeksining 110-moddasi - qiynash bilan jinoyat ishi qo‘zg‘atildi. Shuningdek, bolaga himoya orderi rasmiylashtirildi.
Hozirda voyaga yetmagan bolaning salomatligini tiklash uchun zarur tibbiy muolajalar ko‘rsatilmoqda. Bolalar ombudsmani ma’lumotiga ko‘ra, uning sog‘lig‘i barqaror va yaxshi holatda.
Shuningdek, tuman vasiylik organi tomonidan bolaning qonuniy manfaatlaridan kelib chiqib, vaqtincha vasiylik ta’minlangan.
Ayni paytda ona A.T.ni ota-onalik majburiyatlarini bajarmagani sabab onalik huquqidan mahrum qilish masalasida sudga taqdim etish uchun tegishli hujjatlar tayyorlanmoqda.
Bolalar ombudsmani bolaning xavfsiz va sog‘lom muhitda yashashini ta’minlash maqsadida ushbu holatni kuzatishda davom etishini bildirdi.
