10-sentabr kuni ijtimoiy tarmoqlarda Moskva shahrida Oʻzbekiston fuqarolarining ushlangani aks etgan videolar tarqaldi.
Holat yuzasidan Oʻzbekistonning Rossiyadagi elchixonasi Konsullik boʻlimi xodimlari Migratsiya agentligining Moskva shahridagi vakolatxonasi vakillari bilan birgalikda «Kommunarskiy» OMVDga borib, voqea tafsilotlarini oʻrgandi hamda fuqarolarga zarur yordam koʻrsatish choralarini koʻrdi.
Rossiya tomoni bilan oʻtkazilgan uchrashuvda maʼlum boʻlishicha, «Kommunarka-1» SNT hududida joylashgan xostelda reyd tadbirlari oʻtkazilgan. Uning natijasida politsiya boʻlimiga jami 32 nafar xorijiy fuqaro olib kelingan. Ularning 7 nafari Oʻzbekiston fuqarolari boʻlgan.
Oʻzbekiston tomoni va Rossiya mutasaddilari oʻrtasida oʻtkazilgan muzokaralar natijasida 6 nafar Oʻzbekiston fuqarosi ozod qilingan.
Yana bir Oʻzbekiston fuqarosi migratsiya qonunchiligi talablarini buzgani aniqlangani sababli uni Rossiya Federatsiyasi hududidan chiqarib yuborish boʻyicha belgilangan tartibda qaror qabul qilingan.
Shuningdek, ijtimoiy tarmoqlarda «Kommunarskiy» OMVDda fuqarolardan biri vafot etgani haqida tarqalgan maʼlumot ham tekshirilgan. Rasmiy maʼlumotga koʻra, bu xabar oʻz tasdigʻini topmagan.
