Daniyaning janubiy sohilidagi Ryodbyuxavn yaqinida Femarnbelt tunneli qurilishi vaqtida dengiz tubidan olib chiqilgan grunt hisobiga qariyb 300 ming kvadrat metrlik yangi hudud barpo etildi. Bu maydonni kelgusida aholi va sayyohlar uchun tabiiy dam olish maskaniga aylantirish rejalashtirilgan.
Femarnbelt - Daniya va Germaniyani Boltiq dengizi osti orqali bogʻlaydigan avtomobil va temiryoʻl tunneli. Uning uzunligi 18 kilometrni tashkil etadi. Qurilish yakunlangach, u dunyodagi eng uzun suvga botiriladigan tunnel boʻlishi kutilmoqda.
Tunnel Daniyaning Ryodbyuxavn shahrini Germaniyaning Puttgarden shahri bilan bogʻlaydi. Loyihani 2029-yilda yakunlash rejalashtirilgan.
Inshoot 89 ta yirik beton elementdan tashkil topadi. Har bir elementning uzunligi 217 metr, ogʻirligi esa qariyb 73 ming tonnani tashkil qiladi. Ular dengiz tubida maxsus qazilgan transheyaga tushirilib, bir-biriga ulanadi.
Tunnel foydalanishga topshirilgach, Hamburg va Kopenhagen oʻrtasida temiryoʻl orqali safar vaqti qariyb ikki soatni tashkil etishi kutilmoqda. Tunnel orqali avtomobilda harakatlanish esa bir soatdan sal koʻproq vaqt olishi aytilgan.
Dengizdan oʻzlashtirilgan yangi hudud ham obodonlashtiriladi. U yerda uchta hovuz tashkil etish va sohil iqlimining murakkab sharoitlariga chidamli oʻsimliklar ekish rejalashtirilgan. Loyiha operatori Sund & Bælt yangi hudud kelajakda tashrif buyuruvchilar uchun oʻziga xos tabiiy maskan boʻlishini bildirgan.
