Rasmiy manbalarda fast fuddan zaharlanganlar soni 57 nafar koʻrsatilgan boʻlsa-da, surishtiruv davomida shifoxonalarda davolanayotgan bemorlarning yaqinlari bu raqam 100 dan ortiq ekanini maʼlum qilishdi.
Ogʻirroq ekan, reanimatsiyaga olishyapti...
“21 yashar nevaramni shifoxonaga yotqizgan edik. Endi ahvoli ogʻirroq boʻlgani uchun reanimatsiyaga olamiz deyishyapti.
Bir kun avval nevaram uyda tushlik qilib boʻlib bozorga borishini aytdi. Bozorda doʻstini uchratgan. Bozordan chiqib, ular birga xot-dog yeyishgan. Oʻsha xot-dogning orqasidan shuncha tashvish orttirdik.
Uyimiz xot-dog sotadigan shoxobchaning orqasida. Uyga olib kelib ham, oshxonasiga borib ham tez-tez xot-dog va boshqa taomlaridan isteʼmol qilib turardik. Avval bunday holat kuzatilmagan edi. Endi qoʻlimizdan nima ham kelardi? Alloh shifo bersin barcha bemorlarga”, deydi nevarasi shifoxonada davolanayotgan Dilbaroy aya Dehqonova.
Bemorlar 200 kishidan oshiq...
“18-sentabr kuni qizim darsdan mazasi qochib, uyga qaytib keldi. Harorati koʻtarilib toʻshakka mixlandi. Avvaliga gripp deb oʻylab, dori-darmon qildik. Keyinchalik qorni ogʻrib, ogʻriq tobora kuchayishni boshladi. Surishtirsak, bir kun oldin, 17-sentabr kuni qizlar bilan shovurma yeyishgan ekan. Shifoxonaga keldik. Hozir isitmasi tushib, ancha oʻziga kelib qoldi. Shifoxonaga juda koʻp bemor keldi. Hattoki joy topish muammo boʻldi. Joy yetmaganlar xususiy shifoxonalarga ham joʻnatildi. Reanimatsiyada ham bemorlar bor. Ogʻir kasallar reanimatsiya boʻlimida. Bilganim, zaharlanganlar 200 kishidan oshiq. Kasallikni oshkor qilmay, uyida davolanib turganlar ham bor”, deydi qizini shifoxonada davolatayotgan ona.
Joy yetmagan bemorlar xususiy shifoxonalarda...
“16-sentabr kuni soat 22:00 da fast fud yegani borgan edim. Xot-dogni yarmigacha yedim hamki ozroq hidlangani sezildi. Qornim ochligi uchun bunga ahamiyat bermay hammasini yedim. Keyin uyga kirib, uxlashga yotdim. Soat 2:00 larda toʻsatdan oshqozonim ogʻrib uygʻonib ketdim. Ertalab soat 3:00 larga yaqin “yugurtirdi”. Ertasi kuni ishxonada boshim ogʻrib, qon bosimim oshib ketdi. Ilojsizlikdan shifoxonaga yotishga majbur boʻldim.
