Oʻzbekiston Respublikasi Oziq-ovqat mahsulotlari xavfsizligi qoʻmitasi raisiga toʻrt nafar oʻrinbosar tayinlandi. Bu haqda 20-avgust kuni qoʻmita matbuot xizmati xabar berdi.
Xurshid Hotamjonovich Rahmatullayev qoʻmita raisining moliya va iqtisod yoʻnalishi boʻyicha oʻrinbosari lavozimiga tayinlandi. Tayinlovga qadar u “Oʻzsuvtaʼminot” AJ boshqaruv raisining moliya-iqtisodiy, raqamlashtirish va transformasiya masalalari boʻyicha oʻrinbosari lavozimida ishlab kelgan.
Jamshid Olimovich Urunov qoʻmita raisining oʻsimliklar karantini va himoyasi yoʻnalishi boʻyicha oʻrinbosari lavozimiga tayinlandi. Tayinlovga qadar u Oʻzbekiston Prezidenti huzuridagi Tadbirkorlik subektlarining huquqlari va qonuniy manfaatlarini himoya qilish boʻyicha vakil (Biznes-ombudsman) oʻrinbosari lavozimida ishlab kelgan.
Furqat Zokirovich Jalilov qoʻmita raisining veterinariya va hayvonlar salomatligini himoya qilish yoʻnalishi boʻyicha oʻrinbosar lavozimiga tayinlandi. Tayinlovga qadar u Prezident Administratsiyasi Huquqiy ekspertiza va kompleks tahlil qilish departamenti bosh inspektori lavozimida ishlab kelgan.
Elyor Xolmatovich Talaboyev qoʻmita raisining komplayens va korrupsiyaga qarshi ichki nazorat boʻyicha oʻrinbosari lavozimiga tayinlandi.
Oziq-ovqat mahsulotlari xavfsizligi qoʻmitasi prezident farmoni bilan 2026-yil may oyida, Oʻsimliklar karantini va himoyasi agentligi hamda Veterinariya va chorvachilikni rivojlantirish qoʻmitasi negizida tashkil etilgan. Qoʻmita raisi lavozimiga Oʻzbekiston prezidentining Jahon savdo tashkiloti boʻyicha vakili Azizbek Urunov tayinlangan.
