Toshkent shahrida Yoʻl harakatini tashkil etish markazi Lutfiy koʻchasining 2,4 kilometrlik qismida mikromobillik vositalari uchun alohida harakatlanish yoʻlagini sinovdan oʻtkazdi.
Yoʻlak velosipedlar, elektrosamokatlar, elektroskuterlar va boshqa mikromobillik vositalari uchun moʻljallangan.
Markaz maʼlumotiga koʻra, shaxsiy mikromobillik vositalari va yetkazib berish xizmatlaridan foydalanuvchilar soni ortib bormoqda. Ular uchun alohida infratuzilma boʻlmagan holatda foydalanuvchilar qatnov qismida avtomobillar, trotuarlarda esa piyodalar bilan bir makonda harakatlanishga majbur boʻladi.
Turli tezlikda harakatlanuvchi oqimlarni ajratish maqsadida tashkil etilgan yangi yoʻlak transport va piyodalar yoʻnalishlarining oʻzaro kesishishini kamaytirishga xizmat qiladi.
Rasmiy maʼlumotda Lutfiy koʻchasidagi pilot loyiha ijobiy natija koʻrsatgani taʼkidlangan. Yangi yechim foydalanuvchilar uchun qulay va tushunarli boʻlib, shahar sharoitida mikromobillik uchun alohida infratuzilma yaratish imkoniyatlarini baholashga yordam bergan.
Kelgusida bunday yoʻlaklarning xavfsizligini oshirishga alohida eʼtibor qaratiladi. Yoʻl sharoitidan kelib chiqib, ularni avtomobillar harakatidan maxsus delineatorlar, ajratuvchi va boshqa himoya vositalari yordamida jismonan ajratish rejalashtirilmoqda.
Bu mikromobillik vositalari foydalanuvchilari uchun xavfsiz muhit yaratish va ularning transport oqimi bilan toʻqnashish xavfini kamaytirishga qaratilgan.
Loyihadan koʻzlangan maqsad avtomobillar qatnov qismida, piyodalar trotuarda, velosiped va boshqa mikromobillik vositalari esa alohida xavfsiz yoʻlakda harakatlanadigan tizimni shakllantirishdan iborat.
Sinov natijalariga koʻra, Markaz mutaxassislari ayni paytda poytaxtning shunday yechimni qoʻllash mumkin boʻlgan boshqa koʻcha va hududlarini ham oʻrganmoqda.
Lutfiy koʻchasida orttirilgan tajriba Toshkentda mikromobillik infratuzilmasini bosqichma-bosqich rivojlantirishda qoʻllanishi rejalashtirilgan.
