2026-yil 1-noyabrdan boshlab Oʻzbekiston fuqarolarining Misrga kirishi boʻyicha yangi tartib amal qiladi. Bu haqda Oʻzbekistonning Qohiradagi elchixonasi maʼlum qildi.
Viza oldindan olinadi
Oʻzbekiston fuqarolari Misrga safardan oldin kirish vizasini Misrning diplomatik vakolatxonalari orqali rasmiylashtirishi kerak boʻladi.
Turistik safarlar
Turistik safarlar vakolatli turoperatorlar orqali tashkil etiladi.
40 yoshgacha boʻlgan sayyohlar
40 yoshgacha boʻlgan fuqarolar Misrga faqat yaqin oila aʼzolari - ota-onasi, turmush oʻrtogʻi yoki farzandlari hamrohligida borishi mumkin. Bunda oila tasarrufida safar davomida kamida 5000 AQSH dollari naqd mablagʻ boʻlishi talab etiladi.
40 yoshdan oshganlar
40 yoshdan yuqori mustaqil sayohat qiluvchilar kamida 3000 AQSH dollari naqd mablagʻga ega boʻlishi lozim.
Misrga kirishda talab qilinadigan hujjatlar:
mehmonxona band qilinganini tasdiqlovchi hujjat;
mobil aloqa maʼlumotlari;
yetarli moliyaviy taʼminot tasdigʻi.
Turistik vizani oʻzgartirish mumkin emas
Misrda boʻlish davomida turistik vizani boshqa turdagi vizaga almashtirish boʻyicha murojaatlar qabul qilinmaydi.
Talablarga rioya qilinmasa, sayyoh Misrga kiritilmasligi va uni olib kelgan aviakompaniya orqali qaytarilishi mumkin.
Elchixona fuqarolardan Misrga safarlarni rejalashtirishda ushbu talablarni inobatga olishni soʻradi.
