Prezident Shavkat Mirziyoyev 23-sentabr kuni Andijon viloyatiga tashrifi davomida Baliqchi tumanidagi «Sokin savdo servis» parrandachilik klasteri faoliyati bilan tanishdi.
Klasterga 2010-yilda asos solingan. Bugungi kunda uning Andijon viloyatida 5 ta, Namangan viloyatida 3 ta xoʻjaligi mavjud. Toshkent viloyatidagi korxonada esa parrandalar uchun ozuqa ishlab chiqariladi. Loyihaning umumiy qiymati 29 million dollarni tashkil etadi. Klasterda 417 nafar kishi mehnat qilmoqda. Majmuada 1,5 million bosh broyler tovugʻi parvarishlanmoqda. Yiliga 8,2 million dona broyler boqish va 20,6 ming tonna parranda goʻshti yetishtirish imkoniyati mavjud. Majmuada yiliga 55 ming tonna tovuq goʻshti va yarim tayyor mahsulotlarni qayta ishlash quvvatlari yaratilgan. 2027-yil yakuniga qadar parranda chiqindilarini qayta ishlashga moʻljallangan rendering liniyasi ishga tushiriladi hamda parranda boqishda koʻp qavatli katak tizimi joriy etiladi. Ushbu ikki loyihaga 10 million dollar yoʻnaltiriladi.
Shuningdek, prezident Shavkat Mirziyoyev Baliqchi tumanidagi «Chinobod real biznes» korxonasining baliq yetishtirish loyihasi bilan tanishdi.
Korxona vodiydagi baliqchilik xoʻjaliklarining forel chavogʻiga boʻlgan ehtiyojini qondirishga xizmat qiladi.
Loyihaning umumiy qiymati 30 milliard soʻmni tashkil etadi. Korxonada 30 ta ish oʻrni yaratilgan. Ikki gektar maydondagi zamonaviy majmuada yiliga 200 tonna baliq goʻshti va 2,5 million dona baliq chavogʻi yetishtiriladi. Yillik ishlab chiqarish hajmi 50 milliard soʻmni tashkil etadi. Intensiv texnologiyalar qoʻllanilishi natijasida ikki gektar maydonda anʼanaviy usuldagi 100 gektarlik havzalar bilan teng hajmda mahsulot yetishtirish imkoniyati yaratilgan. Majmuada taʼlim va ishlab chiqarish integratsiyasi ham yoʻlga qoʻyilgan. Andijon qishloq xoʻjaligi va agrotexnologiyalar instituti bilan hamkorlikda «Baliqchilik va parrandachilik amaliyot markazi» tashkil etilgan. Bu yerda talabalar nazariy bilimlarini ishlab chiqarish jarayonida mustahkamlab, amaliy koʻnikma orttirmoqda.
